ԲՀԿ խմբակցության պատգամավոր Տիգրան Ուրիխանյանը պատգամավորական մանդատը վայր դնելու դիմում էր ներկայացրել ԱԺ նախագահ Գալուստ Սահակյանին:
Այսօր Գալուստ Սահակյանը ԱԺ նիստում հայտարարեց, որ Տիգրան Ուրիխանյանը կարող է 15-օրյա ժամկետում գրավոր դիմումով հետ վերցնել հրաժարականի իր դիմումը. «Իսկ եթե այդ ժամկետում դիմումը հետ չի վերցնում, հրաժարականը համարվում է ընդունված»:
Այսիր նաեւ քվեարկության դրվեց Հարկային օրենսգիրքը երրորդ ընթերցմամբ եւ ամբողջությամբ ընդունելու մասին: Մինչ քվեարկությունը Հրանտ Բագրատյանը զգուշացրեց, որ փորձեցին պատը ծակել, բայց ոչ մի բան չի ստացվում փոխել: Նա ասաց, որ այդ օրենսգրքով առնվազն երկու հակասահմանադրական դրույք է պարունակում. «Մեկը այն է, որ կանխավճար է պահանջվում մարդուց, երբ ինքը փող չի աշխատել, երկրորդը՝ Սահմանադրությամբ ասվում է՝ պետությունը կրոնական կազմակերպությունների ազատություն է ապահովում: Ստացվում է, որ կաթոլիկ հայերի եկեղեցին հարկվում է, Հայ Առաքելականը չի հարկվում, դա Սահմանադրության կոպիտ խախտում է»:
Կարդացեք նաև
Էդմոն Մարուքյանն ասաց, որ ինքը 10 էջից ավելի առաջարկություններ է ներկայացրել, 90 տոկոսը չեն ընդունվել, եւ ինքը դեմ է քվեարկելու:
ԲՀԿ խմբակցության պատգամավոր Միքայել Մելքումյանն էլ հայտարարեց, որ ԲՀԿ-ականները չեն մասնակցելու քվեարկությանը:
Խաչատուր Քոքոբելյանը նույնպես դժգոհ էր, նա առաջարկեց գոնե մի քանի օրով քվեարկությունը հետաձգել, ստուգումների գործիքակազմը գոնե հստակեցնելու համար:
ՀԱԿ խմբակցության ղեկավար Լեւոն Զուրաբյանն էլ ասաց, որ իրենց քննարկման չեն հրավիրել. «Սա նշանակում է, որ նորանշանակ վարչապետն՝ իր թիմով, նույն դիրքորոշումն ունեն: Համակարգը գործում է՝ անկախ նրանից, թե ով է վարչապետ, ով է կառավարություն: Մենք գործ ունենք նույն կոռումպացված համակարգի հետ, մենք դեմ ենք քվեարկելու»:
ԱԺ տնտեսական հանձնաժողովի նախագահ Վարդան Այվազյանն էլ հեգնեց, թե պարոն Սահակյան, ես ձեզանից բողոք ունեմ, ինչո՞ւ ինձ հրավիրատոմսեր չեք տվել, որ ես հրավիրեի: Նա ասաց, որ 25 քննարկում է եղել:
Հարկային օրենսգիրքն ամբողջովին ընդունվեց 78 կողմ, 19 դեմ ձայների հարաբերակցությամբ:
Հռիփսիմե ՋԵԲԵՋՅԱՆ
