ՀՀԿ փոխնախագահ Արմեն Աշոտյանը հոկտեմբերի 3-ին լրագրողների հետ հանդիպման ընթացքում անդրադարձավ նաեւ կիրակի ՏԻՄ ընտրությունների ընթացքում «Համախմբում» կուսակցության գրանցած արդյունքին:
«Նախկին արտգործնախարարի նորաստեղծ կուսակցությունը 4 պատգամավորներով, որը լծված էր ամբողջ քարոզչական, տեղեկատվական, կազմակերպչական եւ ֆինանսական ռեսուրսով Գյումրիի եւ Վանաձորի ընտրություններին, Գյումրիում հավաքեց նույնքան ձայն, որքան հավաքեց մինչեւ այդ անհայտ «Գյումրեցու ոգի» կուսակցությունը:
Կարծում եմ՝ քաղաքական հետագա ամբիցիաների համար այս կուսակցությունը օբյեկտիվ հիմքեր չունի գոնե Գյումրիի եւ Վանաձորի ընտրությունների արդյունքով: Չգիտեմ, թե ինչպիսի ռազմա եւ մարտավարություն իրենք կդրսեւորեն ապագայում, բայց այնուհանդերձ, այս փուլում ակնհայտ է, որ այս քաղաքական նախագիծը ձախողվեց դեռ չծնված»,- ասաց նա:
Արմեն Աշոտյանը ընդգծեց, որ ընտրությունների որակը բավարարում է Հանրապետական կուսակցությանը, իրենք գոհ են գրանցված արդյունքներից. «Մենք կարծում ենք, որ ժողովրդի տված վստահության քվեն լավագույն պատասխանն է այն հոռետեսներին, որոնք 15 տարի է կանխատեսում են Հայաստանի Հանրապետական կուսակցության քաղաքական պարտությունները: Ամենակարեւորը, ինչի շնորհիվ մենք կենսունակ ենք, այն է, որ մենք ունակ ենք փոփոխվելու, մենք ունակ ենք, ի տարբերություն շատ ու շատ քաղաքական ուժերի, լինել շատ ավելի ճկուն, դինամիկ, ժամանակակից»:
Կարդացեք նաև
Ամի ՉԻՉԱԿՅԱՆ
