Հայաստանի Հանրապետության անկախության 25-ամյակին նվիրված միջոցառումների շրջանակում սեպտեմբերի 30-ին և հոկտեմբերի 1-ին տեղի ունեցավ «Երիտասարդ բժիշկների հայկական ասոցիացիայի» «Ապագայի բժշկություն. համատեղ հայացք համընդհանուր խնդրին» խորագրով 3-րդ տարեկան միջազգային գիտաժողովը՝ ՀՀ առողջապահության նախարարության աջակցությամբ:
Գիտաժողովի մասնակիցներին ողջունելով` ՀՀ առողջապահության նախարարի տեղակալ Սերգեյ Խաչատրյանը կարևորեց, որ բազմաբնույթ մասնագիտական հարցերից զատ երիտասարդ բժիշկների համար օրակարգային են բժշկական ծառայությունների որակի մշտական բարելավման, բուժաշխատողների մասնագիտական կրթության և շարունակական մասնագիտական զարգացման հարցերը։
Գիտաժողովի շրջանակներում հիմնական շեշտադրմամբ ներկայացվեցին 25-ամյա անկախ պետականություն ունեցող ազգային առողջապահության համակարգի ձեռքբերումները և միջգիտակարգային մոտեցմամբ քննարկվեց ոլորտի զարգացման նոր տեսլականը:
Կարևորելով հիվանդությունների բուժման միջգիտակարգային մոտեցումը, գիտաժողովը կազմակերպվել էր Պլաստիկ վիրաբույժների հայկական ասոցիացիայի, Ռադիոլոգների հայկական ասոցիացիայի, Ուռուցքաբանների հայկական ասոցիացիայի, Գինեկոլոգների հայկական ասոցիացիայի, Հոգեուռուցքաբանության հայկական ասոցիացիայի մասնակցությամբ:
Գիտաժողովի առաջին օրը պլենար նիստի ընթացքում քննարկվեցին առողջապահության կազմակերպման և հանրային առողջապահության արդի մարտահրավերները, ոլորտի զարգացման նոր հայեցակարգը, իսկ ԱՄՆ-ից հրավիրված առողջապահության ֆինանսավորման մասնագետը ներկայացրեց առողջապահության ֆինանսավորման ԱՄՆ մոդելը:
Գիտաժողովի երկրորդ մասը նվիրված էր նեղ մասնագիտական բաժինների քննարկումներին, որի ընթացքում ուռուցքաբանության, ներքին հիվանդությունների, մանկաբարձության և գինեկոլոգիայի, տղամարդու վերարտադրողական առողջության, պլաստիկ վիրաբուժության, էսթետիկայի և մաշկաբանության, ստոմատոլոգիայի և դիմածնոտային վիրաբուժության, ինչպես նաև ճառագայթային ախտորոշման նորագույն մեթոդների և բուժման նոր մոտեցումների մասին զեկուցումներով հանդես եկան ինչպես ոլորտի անվանի մասնագետները, այնպես էլ երիտասարդ՝ անկախության սերունդը:
Գիտաժողովի շրջանակում անցկացվեց նաև կլինիկական օրդինատորների կողմից կլինիկական դեպքերի ներկայացման մրցույթ` «Ես եմ անկախության սերունդը» խորագրով: Ներկայացվեցին 10 կլինիկական դեպքեր: Մրցույթի արդյունքները մասնագիտական հանձնաժողովն ամփոփեց գիտաժողովի 2-րդ օրը՝ համապատասխանաբար որոշելով հաղթողին:
Գիտաժողովն առանձնահատուկ էր հատկապես իր ընդգրկունությամբ. ներկա էին բազմափորձ բժիշկներ ինչպես մայրաքաղաքից, այնպես էլ հանրապետության բոլոր մարզերից և արտասահմանից:
Մամլո հաղորդագրություն
