Գյումրու որոշ թաղամասերում ՏԻՄ ընտրություններն անցնում են բավական լարված, հատկապես քաղաքի ծայրամասային հատվածներում, որոնք աչքից հեռու են, օրինակ՝ Մուշ թաղամասում, այսպես կոչված «Գծի հետև» վայրում մարդկանց մեքենաներով ու «գազելներով» հասցնում են ընտրատեղամասեր, մի բան էլ ներկա-բացակա անում։ Նախընտրական որոշ շտաբներ, օրինակ՝ ԳԱԼԱ-ն, Հայկական վերածնունդն» արդեն իսկ ահազանգեր են ստացել բաժանվող ընտրակաշառքի մասին։
Մենք եղանք Գյումրու Երկաթգծի կայարանի հետնամասում գտնվող Վազգեն Առաջինի անվան թիվ 27 դպրոցում տեղակայված թիվ 34/70 ընտրատեղամասում։ Այստեղ անասելի ակտիվություն էր նկատվում․ նախ ընտրատեղամաս մտնելու մեծ հերթ էր գոյացել, ընտրատեղամասի դիմաց հսկողություն էին սահմանում թաղի տղաները, մեծ թվով մեքենաներ կային կուտակված․ մարդկանց ընտրատեղամաս էին հասցնում ջիփերով։ Մեր՝ այս ընտրատեղամասի դիմաց գտնվելու պահին անգամ մի «գազել» կանգնեց՝ ընտրողների մեծ թիվ ապահովելով։
Կարդացեք նաև
Ինչպես մեզ հետ զրույցում ներկայացրեց ԳԱԼԱ կուսակցության ներկայացուցիչ Հերմինե Մկրտչյանը, այս թաղամասի երկու ընտրատեղամասում էլ ընտրությունները դեռ չմեկնարկած անասելի ակտիվություն է նկատվել։ «Ընտրատեղամասերը դեռ չբացված, առավոտյան ժամը 8-ից ընտրողներին մեքենաներով բերել-շարել են, որպեսզի ընտրատեղամասերը բացվեն ու անմիջապես նրանք մտնեն։ Բոլորիս հայտնի է, թե ովքեր են «Բալասանյան դաշինքի» ներկայացուցիչներն են։ Մի քանի անգամ դիմել ենք ոստիկանության միջամտությանը, որովհետև ներսում գտնվող մեր վստահված անձիք արձագանքել են, որ չափից մեծ կուտակումներ են ներսում, իսկ մենք գիտենք, երբ ընտրողների թիվը 15-ը գերազանցում է, չի թույլատրվում ներս մտնել։
Դրսում էլ մեծ կուտակումներ են։ Անգամ տեղեկություններ ստացանք, որ այս դպրոցի դիմացի բնակարանում ընտրակաշառք են բաժանում, բայց չնշվեց, թե որ թեկնածուն է բաժանում , բայց եթե ակտիվ են այն անձիք, որոնք ներկայացնում են «Բալասանյան դաշինքը», ուրեմն կարելի է ենթադրել, թե ովքեր են բաժանողները։ Քիչ առաջ էլ շարժ նկատվում էր «Բալասանյան դաշինքի» Գծի հետևի շտաբում, երբ մոտեցա, դուռը փակեցին, երբ այս հարցերը կարգավորեցին, հիմա դուռը բացել են», -ասաց Հերմինե Մկրչտյանը։
Հերմինե Մկրտչյանը նաև ասաց, որ Սամվել Բալասանյանը իր հույսը դրել է ագրեսիվ կանանց վրա, որոնք գալիս են, խոչընդոտում են թե՛լրագրողների, թե՛ իրենց աշխատանքը։ Հերմինե Մկրտչյանի խոսքի վրա մի կին եկավ ու սկսեց վիճաբանել նրա հետ՝ սկսեց գոռգոռալ, անպատվել նրան, թե ԳԱԼԱ-ն հանում է իրենց թաղի անունը, ավելորդ բաներ է խոսում։ Երբ մենք այդ կնոջը հարցրինք, թե ո՞վ եք դուք, ո՞վ է ձեզ ուղարկել, կինն ասաց․ «Ես թաղի բնակիչ եմ, պիտի հսկեմ, որ մարդկանց թողնեն գան ընտրության»։
https://www.youtube.com/watch?v=tAqDrtrr1CI
Նունե ԱՐԵՎՇԱՏՅԱՆ
