Այս կերպ պատրաստված ձուկը կարելի էր կոչել նաեւ՝ «Ձուկն՝ իտալական ձեւով», քանի որ պատրաստված է իտալական պեստո թանձրուկով, սակայն տվյալ դեպքում կարեւորել ենք ոչ թե թանձրուկը, այլ՝ պատրաստման տեխնիկան:
Անհրաժեշտ մթերքները
Ձուկ- 1,5 կգ (կարող եք վերցնել իշխան, սիգ, պնդաճակատ, լոքո, թառափ, ցանկացած այլ խոշոր ձուկ)
Պեստո թանձրուկ- 100 գրամ (1 ճաշի գդալ՝ յուրաքանչյուր կտոր ձկան համար)
Կարդացեք նաև
Աղ, սեւ պղպեղ- ըստ ճաշակի
Լոլիկ
Կիտրոն
Յուղաթուղթ (калька)
Պատրաստման եղանակը
Ձուկը մաքրել, լվանալ, կտրատել հավասար կտորների: Նույն քանակով կտրատել յուղաթղթի կտորները՝ այն մակերեսով, որ ձուկը ազատ տեղավորվի մեջը, եւ հնարավոր լինի պարկի պես փաթաթել թուղթը:
Ձկան վրա աղ, պղպեղ անել, արանքները դնել լոլիկի եւ կիտրոնի մեկական շերտ, վրան քսել 1 ճաշի գդալ պեստո թանձրուկ: Յուղաթղթի կտորները թրջել ու լավ ճմռթել: Ձուկը դնել թղթի վրա, պարկի նման վրա բերել եւ կապել : Տեղավորել պարկիկները ջեռոցի թավայի մեջ եւ դնել 200 աստիճան տաքացված ջեռոցը 30 րոպեով:
Կարելի է մատուցել անմիջապես պարկիկով՝ կողքը որպես խավարտ դնելով բրինձ կամ բանջարեղենային որեւէ աղցան:
Ինչ վերաբերում է պեստո թանձրուկին: Այն կարելի է գնել ցանկացած սուպերմարկետից, սակայն հնարավորության դեպքում նախընտրելի է պատրաստել տանը: Անհրաժեշտ է մի կապ բազիլիկ (երեւանյան սուպերմարկետներում երբեմն լինում է բազիլիկ, ասենք, «ֆրանսիական ռեհան» անունով, եթե չգտնեք, կարող եք վերցնել մաղադանոս կամ ռուկոլա), 2-3 ճաշի գդալ մայրու ընկույզ (кедровый орешек), որը կարող եք գտնել արեւելյան խանութներում (դա էլ կարող եք փոխարինել սովորական ընկույզով), 1-2 պճեղ սխտոր, 4 ճաշի գդալ ձիթապտղի յուղ եւ 30 գրամ պարմեզան պանիր՝ քերիչի մանր ատամներով քերած: Այս բոլոր բաղադրիչները պետք է ձեռքի հարիչով (բլենդերով) համասեռ զանգված դարձնել:
Եվ վերջապես՝ այս տեխնոլոգիայով՝ յուղաթղթե պարկիկի մեջ, ձուկը կարելի է պատրաստել թանձրուկի փոխարեն մի կտոր կարագ կամ մի գդալ մայոնեզ դնելով:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
«Առավոտ» օրաթերթ
01.09.2016թ.
