Այս տարի խաղողի բերքը Վայոց Ձորում նախորդ տարվա համեմատությամբ ավելի պակաս է: Այս մասին Aravot.am-ի հետ զրույցում ասաց Վայոց Ձորի մարզպետ Հարություն Սարգսյանը: Նրա կանխատեսումներով, իրենց մարզում սպասվում է 2000-2500 տոննա խաղող:
Մարզպետին հանդիպեցինք Արենի գյուղում՝ «Գինու փառատոնի» ժամանակ: Մեր հարցին, թե այս տարի՞ էլ գյուղացիները բերքի մթերման խնդիրներ կունենան, ինչպես նախորդ տարի էր եւ մինչեւ ճանապարհներ չփակեցին, խաղողը ճանապարհի մեջտեղը չդատարկեցին՝ նրանց խաղողը չմթերվեց, պարոն Սարգսյանը պատասխանեց, որ նորանշանակ գյուղնախարարը, խաղողագործների հետ, օրերս հանդիպման ժամանակ, հայտարարել է, որ կմթերվի: Նրա խոսքերով, նոր գյուղնախարար Իգնատի Առաքելյանը «հստակ ասել է, որ որեւէ արտադրողի չենք պարտադրելու, շուկայական հարաբերություններ են եւ պետությունը պետք է կարողանա ուղղակի օգնել ե՛ւ գինի արտադրողին ե՛ւ խաղողագործին»:
Մեր այն դիտարկմանն ի պատասխան, թե մթերող ընկերությունները հայտարարում են, որ դեռեւս հինգ տարի առաջվա խաղող ունեն մթերած, որոնք չեն կարողանում իրացնել՝ արտահանման հետ կապված խնդիրների պատճառով, պարոն Սարգսյանը կարծիք հայտնեց, որ արտադրողներն այս տարի էլ կմթերեն:
Մարզի գյուղացիներն առանձնապես սպասելիքներ չունեին նոր կառավարությունից, այսօր նրանց միակ մտահոգությունն այն էր, որ հնարավորինս շատ գինի եւ գյուղմթերք վաճառեն, նրանց խոսքերով՝ հազար ու մի պարտքեր ունեն:
Այս տարի գինու փառատոնին մասնակցում էր նաեւ ՄԱԿ-ի Զբոսաշրջության համաշխարհային կազմակերպության գործադիր տնօրեն Կառլոս Վոգելերը: Նա շրջեց, գինի եւ գյուղական այլ մթերքներ համտեսեց:
Կարդացեք նաև
Մարզպետի ներկայացմամբ, տարեցտարի փառատոնն ավելի մարդաշատ է դառնում: Այս անգամ զբոսաշրջիկները մեկ օր առաջ են եկել Արենիում եւ հարակից գյուղերում գյուղացիների տները վարձել:
Բացի գինուց՝ Վայոց ձորի գյուղացիները նաեւ մեղր, ընկույզ, թթու, պանիր, միրգ եւ տնական այլ մթերքներ էին ցուցադրում ու վաճառում:
Իրենց արտադրանքին ավելի քաղաքակիրթ տեսք տալու համար՝ գյուղացիները պլաստմասե շշերով վաճառվող գինուն էին ապրանքանիշ փակցրել:
Փառատոնին մասնակցում էին նաեւ գինու գործարաններ, որոնց արտադրանքը առանձնացված հատվածում էր ցուցադրվում:
Խաղողի ճզման արարողությունը հատկապես զվարճացրել էր օտարերկրյա զբոսաշրջիկներին, որոնք, նույնիսկ այդ խաղողից ուտում էին:
Մինչ Արենի հասնելը ՄԱԿ-ի ներկայացուցիչներն այցելեցին Խոր Վիրապ:
Լուսինե ԲՈՒԴԱՂՅԱՆ
