«Այսօր մեր արդյունաբերական ծավալները, եթե համեմատենք խորհրդային ժամանակների՝ 1988 թվականի տվյալների հետ, ապա մենք ավելի քան 6-7 անգամ պակաս ապրանք ենք արտադրում, քան այն ժամանակ»,- հոկտեմբերի 1-ին «Զարկերակ» մամուլի ակումբում լրագրողների հետ հանդիպման ընթացքում ասաց Հայրենական ապրանքարտադրողների միության նախագահ Վազգեն Սաֆարյանը:
Նա նշեց, որ եթե 1988 թվականին Հայաստանի համախառն ներքին արդյունքը (ՀՆԱ) կազմում էր 13,5 միլիարդ դրամ, որի մեջ արդյունաբերության մասնաբաժինը 67,5 տոկոս էր, ապա այժմ ՀՆԱ-ն, որը մոտավորապես 10 միլիարդ դոլարի սահմաններում է, արդյունաբերության մասնաբաժինը 17-18 տոկոս է կազմում. «Դա է պատճառներից մեկը, որ մեզնում կա արտագաղթ, գործազրկություն, սոցիալական լարվածություն, սոցիալական անարդարություն, ինչի մասին 2016 թվականի փետրվարի 12-ին ասաց նաեւ Հանրապետության նախագահը: Բայց ինչպես ասում են՝ անցյալը հետ չես բերի»:
Վազգեն Սաֆարյանը ասաց, որ պետք է հետեւություններ անել, մասնավորապես՝ վերականգնել մեր արդյունաբերության ներուժը. «Դրա համար պետք է արդյունաբերական քաղաքականությունը մեզնում դառնա գերակա ուղղություն: Մեզ մոտ ճիշտ է օրենք ընդունվել է արդյունաբերության, բայց այդ օրենքը պետք է ավելի ընդգրկուն լինի իմ կարծիքով, եւ նա պետք է ներառի բոլոր ոլորտները՝ գունավոր մետալուրգիա, սեւ մետալուրգիա, հանքահումքային արդյունաբերություն, ոչ մետաղական նյութերի արտադրություն, տեքստիլ արդյունաբերություն եւ այլն»:
Վազգեն Սաֆարյանը ընդգծեց, որ պետք է վերագործարկել Նաիրիտը, բայց ոչ թե արտաքին միջոցներով, այլ մեր ուժերով. «Մեր հաշվարկներով, մեր մասնագետների հաշվարկներով 70 միլիոն դոլարով կարելի է այդ գործարանը վերագործարկել, հասցնել արտադրություն կազմակերպելու աստիճանի, եւ հետո ներգրավել ներդնողների, որոնք կցանկանան ավելի շատ արտադրանք տալ: Գործարանը կարող է աշխատել, տարբերակներ կան՝ պարսկական հումքով: Գործարանը կարող է ապահովել 100-120 միլիոն համախառն ներքին արդյունք»:
Կարդացեք նաև
Ամի ՉԻՉԱԿՅԱՆ
