Ոլոռը բակլազգիների ընտանիքի միամյա եւ բազմամյա մշակաբույս է, որի հասուն սերմերը պարունակում են 26% սպիտակուցներ:
Համեմատած այլ բանջարանային մշակաբույսերի հետ՝ ոլոռը սպիտակուցային նյութերով ամենահարուստն է եւ սննդարժեքի տեսակետից գրավում է առաջին տեղերից մեկը։ Ոլոռի չոր նյութի մեջ սպիտակուցային նյութերը միջին հաշվով կազմում են մոտ 22-32%, շաքարները՝ 16-27%, օսլան՝ 10-31%, ճարպերը՝ 1,6-2%, թաղանթանյութը՝ 2-6%։ Կալորիականությամբ ոլոռը 1,5-2 անգամ ավելի բարձր է, քան մյուս բանջարեղենները։ Ոլոռը հարուստ է նաեւ A, B եւ C վիտամիններով։ Այն նվազեցնում է խոլեստերինի մակարդակը: Պաշտպանում է քաղցկեղից եւ լավ ազդեցություն ունի ոսկորների վրա:
Ոլոռի եփման տեւողությունը 1-1,5 ժամ է: Հարկավոր է ոլոռի վրա լցնել սառը ջուր եւ եփել թույլ կրակի վրա` կափարիչը ծածկած վիճակում:
Հարկավոր է հիշել, որ ոլոռի պատիճները լավ կպահպանեն իրենց գույնը, եթե եփվեն մեծ քանակությամբ ջրում:
Կարդացեք նաև
Կանաչ ոլոռը կպահպանի իր բնական գույնը, եթե եփելիս մի քիչ շաքարավազ ավելացնեք:
Եթե ոլոռը հին է, հարկավոր է նախօրոք թրջել:
Եփելու ժամանակ ոլոռի վրա խորհուրդ չի տրվում սառը ջուր ավելացնել, դրանից ոլոռը դառնում է անհամ:
Ոլոռի վրա հարկավոր է աղ գցել, երբ արդեն պատրաստ լինի: Հակառակ դեպքում՝ այն չափից ավելի կեփվի, կանհամանա:
Եփած ոլոռից խյուս պատրաստելու համար անհրաժեշտ է տրորել տաք վիճակում, չթողնել սառչի, այդ դեպքում խյուսը կստացվի միատարր, առանց գնդիկների:
Պահածոյացված կանաչ ոլոռը տաքացնել եփուկի հետ միասին, որից հետո եփուկը թափել:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
30.09.2016թ.
