Նախկին ամուսնու կողմից կացնահարված Թագուհի Մանսուրյանն այսօր պատմեց, որ վիրահատությունից հետո իրեն լավ է զգում: Նա այսօր շնորհակալություն հայտնեց իրեն բուժած բժիշկներին, որ իրեն ոտքի են կանգնեցրել. «Որ կարողանամ շարունակել ապրել ու իմ բալիկին մեծացնել, հայրիկիս խնամել»:
Հիշեցնենք, որ հուլիսի 8-ին, ժամը 4.25-ին, ոստիկանության Երևան քաղաքի վարչության օպերատիվ կառավարման կենտրոնից Շենգավիթի բաժնում հաղորդում է ստացվել, որ իրենց է զանգահարել անհայտ քաղաքացի և խնդրել, որ Երևանի Սողոմոն Տարոնցու նրբանցքի 7 շենք թիվ 1 բնակարան շտապ ոստիկան ուղարկեն:
Մեկնած օպերատիվ խումբը նշված վայրից, սպանություն կատարելու կասկածանքով, բերման է ենթարկել 1985 թ. ծնված Վլադիկ Մ.-ին:
Մեկնած օպերատիվ խումբը պարզել է, որ նույն օրը, ժամը 4.10-ին, Սողոմոն Տարոնցու նրբանցքի 7 շենք թիվ 1 բնակարանի շքամուտքում, վիճաբանության ժամանակ, Վլադիկ Մ.-ն կացնահարել է նախկին կնոջը՝ 1979 թ. ծնված Թագուհի Մանսուրյանին, նրա հորը՝ 1954 թ. ծնված Վաչագան Մանսուրյանին, և մորը՝ 1952 թ. ծնված Կարինե Մանսուրյանին: Վերջինս վնասվածքներից տեղում մահացել է, իսկ Թ. Մանսուրյանը և Վ. Մանսուրյանը բազմաթիվ վնասվածքներով տեղափոխվել են հիվանդանոց:
Կարդացեք նաև
Տիկին Մանսուրյանը «Մեդիա կենտրոնում» ասուլիսի ժամանակ նաեւ ասաց, որ ընտանեկան հարաբերությունների դաստիարակումը պետք է սկսվի մանկապարտեզներից ու դպրոցներից. «Տարական դասարաններից սկսած լավ կլինի բարոյագիտություն առարկան մտցնեն, տղաներն ու աղջիկները կհասկանան կնոջ ու տղամարդու տարբերությունը, փոխադարձ սերն ու հարգանքը, բարոյագիտությունը դպրոցից պետք է գա, դեռ մանկապարտեզից»:
Արփինե ՍԻՄՈՆՅԱՆ
Լուսանկարը՝ «Մեդիա» կենտրոնի
