«Շատ զարմանալի էր այդ նշանակումը: Լավ եմ վերաբերվում Արծվիկ Մինասյանին` որպես մարդու, տնտեսագետի, պատգամավորի…: Երկու սցենար եմ տեսնում` «բնապահպաններին ենթարկենք տնտեսագետին, թող ձայները կտրեն»: Դա ընդունելի չէ ինձ համար: Երկրորդ սցենարն ավելի լավատեսական է` կայուն զարգացումը էկոլոգիայի եւ տնտեսագիտության ներդաշնակեցումն է: Դա լավ տարբերակ կլինի»,-«Տեսակետ» մամուլի ակումբում այսօր անդրադառնալով Արծվիկ Մինասյանի` նապահպանության նախարարի պաշտոնում նշանակվելուն, ասաց բնապահպան Կարինե Դանիելյանը:
Նա ադրադարձավ նաեւ ՀՀ վարչապետի եւ Հանրային խորհրդի https://www.aravot.am/2016/09/24/808796/ անդամների հանդիպմանը. «Վազգեն Մանուկյանն ասաց` հրավեր է եղել մասնակցելու Հանրային խորհրդի այն անդամներին, որոնք տնտեսության զարգացմամբ են զբաղվում: Չեմ ուզում ասել, թե դա դարձյալ բնապահպանության հանդեպ արհամարհանքի դրսեւորում է, որը տեսել ենք 25 տարի…Այնպիսի բարբարոս վերաբերմունք են դրսեւորել այս մի կտոր հողի նկատմամբ, որ երբեմն մտածում եմ` Աստված մեզ չի վերադարձնում մեր պատմական հողերը, որովհետեւ դրանք վտանգված կլինեն` նույն բարբարոս վերաբերմունքը կդրսեւորենք»:
Կարինե Դանիելյանը հավելեց, որ առաջիկայում լրագրողներին կներկայացնի բնապահպանական ոլորտի հետազոտություն, որի արդյունքները, իր բնորոշմամբ, մտահոգիչ են:
Լուիզա ՍՈՒՔԻԱՍՅԱՆ
