Այսօր Գյումրու Մուշ թաղամասում՝ նահատակված ավագ լեյտենանտ Մերուժան Ստեփանյանի տան մոտակայքում բացվեց ապրիլյան մարտերին զոհված գյումրեցի յոթ հերոսների՝ Վլադիմիր Մելքոնյանի, Մերուժան Ստեփանյանի, Հրաչ Գալստյանի, Ալեքսան Առաքելյանի, Վիկտոր Յուզիխովիչի, Գևորգ Վարդանյանի, Տիգրան Աբգարյանի անունով պուրակ ու փողոց։ Փողոցը հենց այդպես կոչվում է՝ Ապրիլյան մարտերի հերոսների անվան, այն ընդունել է Գյումրու ավագանին։
Թաղամասի բոլոր բնակիչները, նույնիսկ մեծ դժվարությամբ, ձեռնափայտով տեղաշարժվող տարեց մարդիկ եկել էին մեծարելու իրենց հերոսներին։ Խաչքարի բացման պատիվը ընձեռվեց մեր յոթ հերոսների հարազատներին։
Կարդացեք նաև
Խաչքարն օրհնելուց, առ Աստված աղոթք բարձրացնելուց հետո, ելույթի ձայն խնդրեց Աիդա Սարգսյանը, որի որդին ևս զոհվել է հայրենիքի հանդեպ իր պարտքը կատարելիս, ու դիմելով քառօրյա պատերազմի հերոսների ծնողներին՝ասաց․«Ուզում եմ, որ այս խաչքարերն այլևս չավելանան, թող մեր ազգը հերոսներ շատ ունենա, բայց ոչ կյանքի գնով, այլ հաղթանակներով, ողջ, առողջ տուն վերադառնան։ Սիրելի մայրեր, ես ձեր բախտակիցն եմ, մենք պետք է ուժ հավաքենք, մեր երեխաների փառքն ու պատիվը բարձր պահելու համար, ես երեխայիս մահից հետո ուզում էի մեռնել, բայց մտածեցի՝ իմ մահից հետո իմ երեխայի անունը բարձրացնող ու տարածող չի լինի։ Խնդրում եմ ուժ հավաքեք, որ մեր երեխաներին հիշողները շատ լինեն, թող լույս իջնի մեր հերոսների գերեզմաններին, վստահ եղեք իրենք մեզ տեսնում են․․․»։
Նունե ԱՐԵՎՇԱՏՅԱՆ
