«Նոր վարչապետն ունի երկրի տնտեսության զարգացման վերաբերյալ իր պատկերացումները, կառավարման իր մոդելները եւ փորձում է իր պատկերացումները կյանքի կոչել նախարարությունների անվանափոխությամբ»,- այս կարծիքին է քաղաքագետ Երվանդ Բոզոյանը:
Կհաջողվի՞ վարչապետին նախարարությունների անվանափոխմամբ կյանքի կոչել տնտեսության զարգացման վերաբերյալ իր պատկերացումները, քաղաքագետը չի կարողանում կանխագուշակել.
«Հանրության համար այս ամենն առ ոչինչ են, որովհետեւ հանրությունը սպասում է կոնկրետ արդյունքների, իսկ արդյունքները միանգամից չեն լինում, որոշակի ժամանակ պետք է անցնի, որ կարողանանք գնահատական տալ, թե ինչքանով են նոր վարչապետի պատկերացումները համահունչ երկրի զարգացմանն ու հանրության սպասումներին»:
Կարդացեք նաև
Նա համամիտ չէ քաղաքական որոշ ուժերի ներկայացուցիչների գնահատականներին, որոնք նոր վարչապետի գործողություններում արձանագրել էին շոուի տարրեր. «Վարչապետի առաջին քայլերը կարեւոր են, որ հանրությունը տպավորություն ստանա, թե ինքը ինչ վարչապետ է: Այդ իմաստով նրա կողմից որոշակի PR քայլեր են արվում, ինչը տրամաբանական է, որովհետեւ ցանկացած նոր վարչապետ հենց այդպես էլ կվարվեր: Հանրության մեջ կան մարդիկ, որոնք, ի սկզբանե, չեն հավատում, որ նոր վարչապետին կհաջողվի ինչ-որ բան անել, որովհետեւ համոզված են, որ Հայաստանում վարչապետների փոփոխությամբ չէ, որ հնարավոր են լուրջ փոփոխություններ, հանրության մյուս մասը, ճիշտ հակառակը, մեծ հույսեր ունի, որ այս նոր վարչապետը տարբերվում է մյուս գործիչներից, հանրապետական գործիչ չէ ու կարող է ինչ-որ բան փոխել: Հանրության ճնշող մեծամասնությունը ավելի սպասողական վիճակի մեջ է, փորձում են հասկանալ՝ այս վարչապետի քայլերն ինչին են ուղղված լինելու եւ որոշակի ժամանակ է պետք, որ ամբողջական գնահատական լինի, թե արդյոք կհաջողվի նրան իր այս քայլերով հասնել հաջողության, թե՝ ոչ»:
Արփինե ՍԻՄՈՆՅԱՆ
