Երեկ Ադրբեջանում տեղի ունեցած հանրաքվեում նախագահի լիազորությունների երկարացման օգտին քվեարկել է ընտրողների 91.2 տոկոսը: Այս մասին, ինչպես հաղորդում է «ՌԻԱ Նովոստի»-ն, հայտարարել է Ադրբեջանի Կենտրոնական ընտրական հանձնաժողովի (ԿԸՀ) նախագահ Մազահիր Փանահովը:
Բացի այդ, նախագահ ընտրելու տարիքային սահմանափակումը վերացնելու օգտին քվեարկել է ընտրողների 91 տոկոսը, պատգամավորների տարիքային սահմանափակումը վերացնելու օգտին՝ 88.3 տոկոսը: Փոխվարչապետի պաշտոն սահմանելուն կողմ է արտահայտվել ընտրելու իրավունք ունեցողների 89 տոկոսը:
Երեկ նախքան ընտրատեղամասերի փակվելն արդեն Ադրբեջանի ԿԸՀ-ն ընտրությունները հայտարարեց կայացած: Հանրաքվեի ավարտից հետո հայտարարվեց, որ դրան մասնակցել է ընտրելու իրավունք ունեցողների 69.7 տոկոսը:
Նոր սահմանադրությամբ, փաստորեն, Ադրբեջանի նախագահի լիազորությունների ժամկետը 5 տարուց կերկարաձգվի մինչև 7 տարի, կսահմանվեն առաջին փոխնախագահի և փոխնախագահների պաշտոններ, ինչպես նաև կհանվի նախագահ կամ պատգամավոր ընտրվելու համար տարիքային սահմանափակումը: Բացի այդ, նոր սահմանադրությամբ նախագահին իրավունք կվերապահվի անցկացնել արտահերթ նախագահական ընտրություններ և ցրել խորհրդարանը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
