Արաբկիր Քանաքեռ-Զեյթուն վարչական շրջանների ընդհանուր իրավասության դատարանը այսօր քննեց քննիչի ներկայացրած միջնորդությունը «Սասնա ծռեր» խմբի անդամ Վարուժան Ավետիսյանի կալանքի ժամկետը երկարաձգելու վերաբերյալ: Դատարանը դեռ խորհրդակցական սենյակում է, որոշման հրապարակումը նախատեսված է այսօր:
Վարուժան Ավետիսյանի պաշտպան՝ փաստաբան Արա Զաքարյանը մեզ հետ զրույցում ասաց, որ քննիչն իր միջնորդությունը պատճառաբանել է բազմաթիվ քննչական գործողություններ եւ առերեսումներ կատարելու անհրաժեշտությամբ. «Շաբլոնային արտահայտություն, որը բերվում է բոլոր գործերով ու առանց հիմնավորման»:
Ըստ նրա, այս գործով բերվել են վեց անձանց ցուցմունքներ, դրանցից երեքը տուժողների ցուցմունքներն են, որոնք ներկայացվել են որպես պատանդ բուժաշխատողներ, Վալերի Օսիպյանի եւ այլ անձանց: Ըստ փաստաբանի, նրանցից որեւէ մեկի հետ Ավետիսյանի մասնակցությամբ առերեսում մինչեւ հիմա չի արվել:
Ըստ պարոն Զաքարյանի, քննիչը վերացական մտավախություններ է բերում Վարուժանին անազատության մեջ պահելու համար, օրինակ, որ Վարուժանը կարող է խոչընդոտել նախաքննությանը՝ ազդելով գործով ներգրավված վկաների կամ տուժողների ցուցմունքների վրա. «Բայց չի պարզաբանել, թե օրինակ Վարուժան Ավետիսյանը ճանաչո՞ւմ է այդ անձանց, որ դեռ ազատության մեջ գտնվելու դեպքում էլ կարող է ազդել նրանց ցուցմունքների վրա, թե՝ ոչ»:
Կարդացեք նաև
Արփինե ՍԻՄՈՆՅԱՆ
