«Ինչ-որ բան ասեցինք մեր հարեւաններին, ինչ-որ առումով իր նպատակին ծառայեց, բայց կարեւորն այն բարոյահոգեբանական իրավիճակն է, որը տիրում է բանակում եւ հերոսական զինվորների օրինակը»,-ՀՀ անկախության 25-ամյակի զորահանդեսի մասին այսպիսի կարծիք ունի «Ազգային անվտանգություն» կուսակցության նախագահ Գառնիկ Իսագուլյանը:
«Եթե կարողանանք ստեղծել իրավիճակ, երբ մեր զինվորը բարոյահոգեբանական առումով լինի կատարյալ վիճակում, զենքերի որակը բան չի կարող փոխել: Լավագույն օրինակն Արցախյան պատերազմն էր, երբ Ադրբեջանը միայն Աղդամի զինապահեստներում յոթ անգամ ավելի շատ զինամթերք է ունեցել, քան ուներ Հայաստանը»,-այսօր «Հայելի» մամուլի ակումբում ասաց Իսագուլյանը:
«Լափածները հետ բերեին` այսօր զենք ունենայինք»,-հակադարձեց ԱԱԾ պետի նախկին տեղակալ Գուրգեն Եղիազարյանը:
Կարդացեք նաև
Ըստ նրա. «Զորահանդեսները կարեւոր են ոգու բարձրացման համար, բայց այս մեկն ավելի շատ միտված էր հասարակությանը, որ ապահով Հայաստանից չզզվենք վերջնականապես, որ նայենք զենքերին ու ասենք, որ ապահով Հայաստանում ենք ապրում, որ այդ զենքերը ոսոխին բնում կսատկացնեն: Զորահանդեսը լինում է հաղթանակից հետո, երբ երկաթը կռվում է մարտի դաշտում: Բայց ունենք «800 հեկտար» եւ զորահանդես… բա ինչո՞ւ այդ տեխնիկան լռեց 4 օր շարունակ եւ ոսոխին չսատկացրեց»:
Եղիազարյանը դժգոհեց, որ զորահանդեսի փորձերի պատճառով օրեր շարունակ մայրաքաղաքը խցանված էր. «Նույն վարժանքները կարելի էր անել 24:00-ից հետո»:
Լուիզա ՍՈՒՔԻԱՍՅԱՆ
