ՀՀ կառավարության այսօրվա նիստում կրթության և գիտության նախարարի պաշտոնակատար Լևոն Մկրտչյանը ներկայացրեց «Գյումրու Մ. Նալբանդյանի անվան պետական մանկավարժական ինստիտուտ» ՊՈԱԿ-ը «Շիրակի Մ. Նալբանդյանի անվան պետական համալսարան» հիմնադրամի վերակազմավորելու և գույք տրամադրելու մասին հարցը:
Վարչապետ Կարեն Կարապետյանի համար հասկանալի չէր, թե ինչ փոփոխություն է առաջարկում Լևոն Մկրտչյանը եւ հետաքրքրվեց՝ աշխարհում կա՞ նման համակարգ, որ համալսարանը հիմնադրամ է: Պարոն Մկրտչյանն ասաց, որ շատ երկրներում այդպես է: Բայց պատասխանը երեւի չբավարարեց վարչապետին եւ նա ասաց. «Մենք բազմաթիվ քայլեր ենք անում՝ կիսատ-պռատ, համոզված չլինելով, որ դա ճիշտ է: Գուցե մենք կանգնեցնենք… Ես այս պահին չեմ ուզում ձեր որոշումը կանգնեցնեմ, բայց եթե ինքներդ վստահ չեք, որ սա օգուտ է տալու, գուցե չանե՞նք»:
Լևոն Մկրտչյանը համոզված էր, որ այս որոշումն ավելի լավ վիճակ է ստեղծելու, քան ներկայիս վիճակն է, որ դա ընդհանուր քաղաքականություն է, համալսարանների մի մասում արդեն արվել է: Նա հայտնեց, որ ընդհանուր բուհական համակարգում լուրջ փոփոխությունների կարիք կա:
«Եթե մենք բերում ենք լուծում, որը մինչև վերջ համոզված չենք, որ լավագույնն է, չենք անում: Եթե մենք ինչ-որ գործողություններ արել ենք և իներցիայով ասում ենք՝ արել ենք, շարունակում ենք, դա հիմնավորում չէ: Ես էլ եմ զգում, որ դուք լավագույն լուծումը չեք տալիս, դե, եկեք մեկ շաբաթ էլ մտածենք, լավագույն լուծումը տանք»,- առաջարկեց վարչապետը: Ապա հայտարարեց՝ «Ընդունված է՝ մինչև վերջ չբավարարված»:
Կարդացեք նաև
ԿԳ նախարարն ասաց, որ հոկտեմբերի 1-ին «Բարձրագույն կրթության մասին» օրենքը դրվելու է հրապարակային քննարկման, եւ կփորձեն խնդիրները վեր հանել: Վարչապետը հակադարձեց, որ եթե հոկտեմբերի 1-ին պիտի քննարկեն, ինչո՞ւ են այսօր բերել այս որոշումը:
Նելլի ԲԱԲԱՅԱՆ
Գյումրու մանկավարժականին փոփոխությունը ոչ մի բան չի տա, առավել ևս երբ ռեկտորի պաշտոնակատարը վատահամբավ Սահակ Մինասյանն է, որը ոչ մի բան չի հասկանում բուհական համակարգից և ինստիտուտը դարձրել է հանրապետականի շտաբը՝ խրախուսելով կաշառակերությունը: Այդ անձը ինստիտուտը շատ շուտով կկործանի: