«Եթե ես խանութում ձու վաճառեի առանց մակնշման, հիմա դուք ինձ մորթել, քառատել էիք, ձեր տունը շինվի: Սա լուրջ հետապնդում է կոչվում»,- մեզ հետ զրույցում Բաղրամյանի թռչնաֆաբրիկայի սեփականատեր Արմենակ Խաչատրյանն այսպես պատասխանեց երեկ Պետեկամուտների կոմիտեի տարածած հայտարարությանը իր մի շարք խախտումների մասին: Նա նորանշանակ վարչապետ Կարեն Կարապետյանին 1 շաբաթ ժամանակ է տվել՝ իրեն աջակցելու համար, հակառակ դեպքում սպառնացել էր ընտանիքի՝ 4 երեխաների հետ արտագաղթել. «Ես հասկանում եմ, որ տնտեսապես չեմ կարող իրենց դեմ, հիմա իրենք ամեն քայլ կանեն, Քենեդու սպանությունն էլ կբարդեն իմ վրա»: Գործարարը պնդում է, որ ամեն ինչ անում են, որ Հայաստանից արտագաղթեն. «Անպայման պիտի ֆաբրիկայի 450 աշխատողները հայտնվեն հրապարակում, ոնց որ դրան են սպասում: Էդ ի՜նչ ձեւ են բռնել, ՊԵԿ-ի պաշտպանվելը… քնա՞ծ էիք, նո՞ր զարթնեցիք: Ինչի՞ համար եք անում, ավելի ձեզ թուլացնում եք, խայտառակ եք ձեզ անում»: Նա հայտարարեց, որ ՊԵԿ-ը պաշտոնակռիվ է անում. «Ինձ ստիպում են դառնալ տնտեսական ընդդիմություն, իրենց նստած տաբուրետկաները ինձ հետաքրքիր չեն»:
Կարդացեք նաեւ այստեղ:
Հռիփսիմե ՋԵԲԵՋՅԱՆ
«Առավոտ» օրաթերթ
20.09.2016թ.
