Այսօր «Հայելի» ակումբում ՀՀԿ խմբակցության պատգամավոր Լեւոն Մարտիրոսյանն ասաց, որ այս պահին պետք է խոսել այն դրական լիցքերի մասին, որոնք ի հայտ են եկել նոր վարչապետի նշանակումից հետո, մնացածին կարելի է անդրադառնալ հետո:
Պատգամավոր Թեւան Պողոսյանի խոսքերով՝ ՏԻՄ ընտրությունը ցույց տվեց, որ այս ամենն արվում է ընտրությունների համար. «Էջմիածնում արդեն երրորդ պատմություն է, ավագանու թեկնածուին առեւանգել էին, ամսի 16-ի դեպքերը, պատմությունները կրկնվում են: Չիկագոյի հետ կապված պատմություններ են զարգանում»:
Ըստ Թեւան Պողոսյանի՝ ասում են, որ փոխվել ենք, բայց արդյունքները չեն երեւում:
Լեւոն Մարտիրոսյանն էլ ասաց, որ ընդդիմությունը ցավոք, հավասար ռեսուրսներ չունի՝ մարդկային, ֆինանսական, մասնագիտական ռեսուրս. «Մինչեւ այդ ռեսուրսները չունենան, մեր ժողովրդավարությունը կայացած, կատարյալ չի լինի: Այս պահի դրությամբ իշխող ուժը որեւէ մրցակից չունի»:
Կարդացեք նաև
Լեւոն Մարտիրոսյանն առաջարկեց ռեսուրսներ ունենալու համար միավորվել: Մեր դիտարկմանը, որ չկա ռեսուրս ունեցող ընդդիմություն, որովհետեւ դուք եք որոշում, թե ով զբաղվի քաղաքականությամբ, բուրժուադեմոկրատական հեղափոխություն էին անում՝ չթողեցիք՝ նա արձագանքեց. «Թող անեին»:
Իսկ Թեւան Պողոսյանը պատասխանեց՝ լավ, մենք վատն ենք, թույլ ենք, չունենք ռեսուրս, դուք օրենքով ինչո՞ւ եք շարժվում. «Մի քիչ օրեքով շարժվեք, ամեն ինչ լավ է լինելու»:
Մեր հարցին՝ Լեռնիկ Ալեքսանյանն ասաց, որ առաջընթաց ունի ՀՀԿ-ն, եթե տարիներ առաջ ոչ ոք ռիսկ չէր անի Էջմիածնում թեկնածություն դներ, հիմա դրել են, դուք տեսնո՞ւմ եք առաջընթաց այս առումով՝ Լեւոն Մարտիրոսյանը պատասխանեց. «Առաջընթաց տեսնում եմ, այո»:
Թեւան Պողոսյանն էլ համաձայնեց. «Իրականում առաջընթաց կա: Առաջ, եթե կստիպեին, որ բոլորը հրաժարվեին, կմնար մեկ թեկնածու, հիմա այնպես են անում, որ գոնե էլի վերջում ծեծելով…առաջընթաց կա, հիմա որ նայում ենք, ինչ-որ բան առաջ է շարժվում էլի, թղթերը գրանցում են»:
Հռիփսիմե ՋԵԲԵՋՅԱՆ
