Արարատի մարզի Դեղձուտ գյուղում սեպտեմբերի 18-ին մրցակիցներ են դարձել գործող գյուղապետ, ՀՀԿ անդամ Յուրիկ Մուրադյանը (լուսանկարում) եւ անկուսակցական Հովիկ Նազարպուրը: Ընդ որում գյուղապետը հավակնում է երրորդ անգամ ընտրվել:
Ինչպես Aravot.am-ին ահազանգեցին Դեղձուտից, իրավիճակը լարված է:
«Գյուղապետարանի դրոշից արդեն կարելի է եզրակացություն կազմել գյուղի վիճակի մասին`երեք տարվա դրոշ է վառված, ճղճղված: Այդ մարդը`Յուր ազգային արժեքների հանդեպ որեւէ հարգանք չունի, փողով ՀՀԿ-ի լծակներով փորձում է վերընտրվի, բայց ժողովրդի համբերության բաժակն արդեն լցվել է, թեկնածուն երիտասարդ թեկնածու է, ընդամենը 28 տարեկան: Գյուղի երիտասարդությունը շատ է ցանկանում, որ սերնդափոխություն լինի եւ ճանապարհ տրվի անկախության սերնդին»,-հայտնեցին Դեղձուտից:
Aravot.am-ին նաեւ տեղեկացրին, որ ըստ իրենց տեղեկությունների, 5000 դրամ ընտրակաշառք է բաժանվում, իսկ գործող գյուղապետը փորձում է հոգեբանական ճնշումներ բանեցնել, տեսախցիկով մոտենում է քվեատուփին ու սպառնում, թե ի վերջո կիմանա` ով ինչպես է ընտրել:
Կարդացեք նաև
Aravot.am-ը կապվեց Արարատի մարզպետարանի լրատվության պատասխանատու Գոհար Խաչատրյանի հետ`մեկնաբանություն ստանալու գործող գյուղապետի ու համայնքի վերաբերյալ մեզ հայտված տեղեկությունների մասին: Գոհար Խաչատրյանը փոխանցեց, որ մարզպետարան նման տեղեկատվություն չի հասել, որեւէ մեկը որեւէ ահազանգ չի հնչեցրել:
Պատրաստ ենք հրապարակել նաեւ ՀՀԿ անդամ Յուրիկ Մուրադյանի տեսակետը,որի հետ հնարավոր չեղավ կապվել:
Գոհար ՀԱԿՈԲՅԱՆ
