Արամ Խաչատրյանի տուն-թանգարանում այսօր` սեպտեմբերի 17-ին, բացվեց «Միգրացիայի ուղիները» ցուցահանդեսը, որը ներկայացնում է 50 մարդու ճակատագիր: Լուսանկարներին կից տրված է տեղեկություն` սիրիահայերի, հայրենադարձների կյանքից: Հալեպում ծնված Հրաչ Մելքոնյանն, օրինակ, որպես կամավոր կռվել է Սիրիայի կառավարական բանակի կազմում, ապա եկել Հայաստան: Նա բնակվում է փախստականների հանրակացարանում եւ աշխատում Երեւանի կենդանաբանական այգում` որպես անվտանգության աշխատակից: Մեկ այլ դեպքում էլ լուսանկարների հերոսները որոշ ժամանակ աշխատել են Ռուսաստանում, բայց վերադարձել հայրենի գյուղ:
Նմանօրինակ պատմությունների հերոսներին հավերժացրել են լուսանկարիչներ Վիգեն Մնոյանը եւ Գերման Ավագյանը: Վերջինս լրագրողների հետ զրույցում նկատեց, որ շատ քիչ հայերի է հաջողվել խուսափել աշխատանքային միգրանտի կարգավիճակից. «Ես էլ եմ միգրանտ եղել…ԱՄՆ-ում եմ ապրել ու աշխատել` ոչ իմ մասնագիտությամբ, հետո որոշել, որ ավելի լավ է հայրենիքում սիրելի գործով զբաղվել»:
Վիգեն Մնոյանն էլ նշեց, որ ինքը եւս ժամանակին աշխատել է արտերկրում` Մոսկվայում: Իսկ թե ինչու է վերադարձել, ասաց. «Որովհետեւ կա հայրենիք, ծնողներ, ընկերներ, տուն…»:
Կարդացեք նաև
Հավելենք, որ ցուցահանդեսը Միգրացիոն քաղաքականության մշակման միջազգային կենտրոնի նախաձեռնությունն է` «Աջակցություն Հայաստանին` միգրացիայի և սահմանների կառավարման ոլորտում» ծրագրի շրջանակում:
Լուիզա ՍՈՒՔԻԱՍՅԱՆ
