«Ամենամեծ մարտահրավերը ստեղծագործել ենք մենք՝ այն, որ մեր երկրին մենք դեմք չտվեցինք»,- սեպտեմբերի 17-ին «Բլից ինֆո» մամուլի ակումբում լրագրողների հետ հանդիպման ընթացքում ասաց կառավարման փորձագետ Հարություն Մեսրոբյանը:
«Դրանով ոչ միայն մենք մեր խնդիրները բարդացրեցինք, այլ բոլոր խաղացողների, որոնք հետաքրքրություն ունեն Հայաստանում: Որովհետեւ անհնարին է լուրջ գործ ունենալ մի պետության հետ, որը իր ինչ լինելը չի սահմանում: Օրինակ՝ մենք ուզում ենք լինել բարձր տեխնոլոգիաների տնտեսություն ունեցող երկիր, մենք պետք է զարգացնենք ռազմավարական իմաստով մեծ քիմիան, որի նախադրյալներն ունենք, բայց ինչո՞ւ մեզ մոտ Նաիրիտը չի աշխատում: Որովհետեւ 1991 թվականին մենք դախլեչու հոգեբանությամբ որոշել ենք երկիր կառավարել: Դախլեչին դախլից այն կողմ պատկերացումներ չունի, ուր մնաց Նաիրիտը, ատոմակայանը»,- ասաց նա:
Հարություն Մեսրոբյանի խոսքերով՝ անկախությունը միջոց է, մենք չենք կարողացել այդ միջոցը օգտագործել. «Պարզ հարց տամ՝ պե՞տք է գոնե 1 ռելս լիներ Հայաստան-Իրան, չենք կառուցել, ուրեմն՝ չենք օգտագործելու: Անկախությունը պե՞տք է բերեր նրան, որ ոլորտային զարգացում ապահովեինք, չենք ունեցել, չունենք: Ոչ մի ուժ էլ ո՛չ ծրագիր ունի, ո՛չ կառավարող թիմ ունի, ոչ մի բան չենք արել «թավաքյալի» ապրել ենք, հիմա ընկել ենք, ասում ենք՝ անկախությունն է մեղավոր: Ո՛չ, մենք ենք մեղավոր՝ մենք «թավաքյալի» ենք, ունենք «թավաքյալի» արդյունք: Ծայրահեղ ընդդիմությունից մինչեւ իշխանություն՝ բոլորս «թավաքյալի» ենք: Եկեք ընդունենք, որ մենք «թավաքյալի» ենք, «բառադի» ենք ու չսկսենք՝ անկախությունն է մեղավոր, Ամերիկան է մեղավոր»:
Ամի ՉԻՉԱԿՅԱՆ
Կարդացեք նաև
