Աղավնաձորցիները, որ այսօր առավոտից դարձյալ բողոքի ցույց էին կազմակերպել, տեղափոխվել են խաղողի այգիներ եւ պահանջում են գինեգործների միության նախագահ Ավագ Հարությունյանին: Վերջինս այս գյուղում ունի 16 հեկտար խաղողի այգի, նաեւ գյուղացիներին պարտք է մոտ 1 մլն դրամ:
Ավագ Հարությունյանը եւ գյուղատնտեսության փոխնախարար Ռոբերտ Մակարյանը եկան գյուղ: Գյուղացիների պահանջը Ավագ Հարությունյանից այն էր, որ այս տարի թույլ չեն տալու իր այգիներից ոչ մի գրամ խաղաղ մթերել, մինչեւ իրենցը չհանձնեն:
«Իրենք արդեն կոնկրետ ինձ վնաս են տալիս: Երբ պետք է արդեն 5 օրից սկսեմ բերքահավաքի մի մասը՝ տակերը հավաքեմ, որ մնացածները հասնեն, չեն թողնում: Մինչդեռ ես տարիներով իրենց կողքին եմ եղել, իրենց խնդիրների հետ»,- ասաց Ավագ Հարությունյանը:
Կարդացեք նաև
«Խնդիրը, իհարկե, հասկանալի է, կա, ուղղակի մեխանիզմներն ու ուղիները քիչ են, քանի որ այս պարագայում այլ վարկերով ծանրաբեռնվածության խնդիր կա»,- ասաց պարոն Մակարյանը՝ անդրադառնալով այն հարցին, թե ինչպես այլ պետություններում բերքի ավելցուկը գնում է պետությունը, իսկ մեր երկրում մնում է մթերող ընկերությունների վրա:
Նա ասաց, որ արդեն 25 տարի է՝ պետությունը ընտրել է ազատ շուկայական հարաբերությունը. «Խորհրդային ժամանակներում նման խնդիր չկար: Գործընթացը կատարվում էր պետության կողմից, իսկ այս պահին կախված է հնարավորություններից»:
Խոսելով 800 մլն դրամ պարտքի մասին (դա ամբողջ հանրապետությունում մթերված խաղաղի դիմաց պարտքն է), ասաց, որ ճիշտ է, դա քիչ գումար է կազմում, բայց այդ գումարի ետեւում կանգնած են մարդիկ, որոնք ունեն սոցիալական խնդիրներ:
«Բայց պետք է իմանան, որ խնդիրը ժամանակավոր է եւ պետք չէ հուսահատվել: Միշտ էլ ելքեր կան եւ պետք չէ քանդել այգիները կամ ռադիկալ գործողությունների դիմել: Այժմ գինեգործական արտահանման ծավալները հուսադրող են, ավելանում են: Թե ինչքան ժամանակում կլուծվի հարցը՝ չեմ կարող ասել»,- ասաց պարոն Մակարյանը:
Պարոն Մակարյանը հայտնեց, որ աղավնաձորցիների՝ բանկերի հետ կապված խնդիրների մասին տեղեկացրել է վարչապետին, որպեսզի որոշ ժամանակով վարկերը սառեցնեն: Գյուղացիներից մեկը այս պահին կանգնել է վարկային խնդրի առաջ՝ 1 մլն 900.000 դրամը դարձել է 2 մլն 400.000՝ տույժ-տուգանքներով:
«Վեդի Ալկոյի» սեփականատեր Մանվել Ղազարյանը սեպտեմբերի 1-ին, մեզ հետ զրույցում որպես խնդրի լուծում առաջարկում էր, որ վերամշակող գործարանները արտադրեն խաղողի հյութ, որի առնչությամբ Ռոբերտ Մակարյանն ասաց, «Դա բարդ պրոցես է եւ կախված է պահանջարկից: Շուկան է որոշում, եթե պահանջարկ եղավ՝ որոշ բիզնեսմեններ եւ գործարաններ ներդրումներ կանեն»:
Անուշ ՄԱԹԵՎՈՍՅԱՆ
