Ինչպես արդեն տեղեկացրել ենք, Կենտրոն եւ Նորք-Մարաշ վարչական շրջանների ընդհանուր իրավասության առաջին դատարանում շարունակվում էր Կարո Եղնուկյանի բողոքի քննությունը:
Դատական նիստի ընթացքում Կարո Եղնուկյանը ելույթ ունեցավ, դատավոր Արշակ Վարդանյանը խնդրեց նրան խոսել փաստական հանգամանքների մասին: Կարո Եղնուկյանը պատասխանեց. «Հարգելի՛ դատարան, ես պատուհանից դուրս տեսնում եմ Զորավար Անդրանիկին, որը հուշում է, որ շուտով Անկախության հանրաքվեի 25-ամյակն ենք նշելու: Կեցցե, անկախ եւ ազատ դատարանը եւ մաղթում եմ, որ այս դատարանը լինի ազատ, անկախ եւ արդար: Ինչու եմ շեշտում, որովհետեւ շատ ժամանակ օրենսդրությունը կարող է արդար չլինել եւ չարաշահվել եւ անարդար որոշումներ կայացվել»:
Նա իրավիճակը համեմատեց մանկական խաղի հետ. «Խաղ կա՝ գործագործ, երբ երկուսը գնդակը գցում են, մեկը մեջտեղում է: Հիմա դատախազությունը եւ քննչական մարմինը գնդակը օդ են գցում իրար, եւ ես մեջտեղում կանգնած իզուր վազվում եմ այս կողմից այն կողմ: Օդում գնդակը գցելու նպատակն այն է, որ ինձ հոգնեցնեն՝ տանեն-բերեն, տանեն-բերեն: Մենք դիմում ենք քննչականին՝ ասելով վերացրեք մեղադրանքը, որովհետեւ մեղադրանք արդեն չկա, կամ ձեր բերած փաստարկները չեն հիմնվում: Քննչականն ասում է՝ մենք այն դեռ չենք քննարկի, հետաձգում ենք քննությունը:
Այդտեղ օրենքի չարաշահում է, արդարություն չկա: Դիմում ենք դատախազությանը, ասում ենք՝ դատախազ ջան, քննչականին դիմել ենք, դուք ի՞նչ եք ասում: Դատախազն ասում է՝ քննիչն արդեն ձեր հարցերին պատասխանել է, բայց քննիչը հարցերին չի պատասխանել. քննիչը հետաձգել է պատասխանը: Ինչպե՞ս կարող է դատախազը հղում անի մի բանի, որը չունի բովանդակություն: Դատարանը ինձ հետ միասին դարձել է այդ մեջտեղի խաղացողը, եւ դատախազությունը քննիչի հետ միասին գնդակը գցում է այս կողմից այն կողմ, եւ ես եւ Դուք այդ խաղի մեջ դարձել ենք, այսպես ասած, չլոցի: Ես կուզեմ, որ դատարանը սա տեսնի եւ հասկանա»:
Կարդացեք նաև
Դատական նիստը հետաձգվեց, հաջորդ նիստը տեղի կունենա սեպտեմբերի 27-ին:
Ամի ՉԻՉԱԿՅԱՆ
