Երեւանի մամուլի ակումբի նախագահ Բորիս Նավասարդյանի համոզմամբ, վարչապետի փոփոխության պատճառները շատ էին, բայց գլխավոր պատճառը Հայաստանի արտաքին պարտքն էր:
«Հայաստանի տնտեսական ճգնաժամային իրավիճակի պարագայում ՌԴ-ն պարտքերի մարման առումով մեծ ճնշումներ է կիրառում Հայաստանի նկատմամբ: Այս պայմաններում կառավարությունում պետք է արդյունավետ բանակցող ՌԴ հետ, որը կկարողանա մեղմել ճնշումները: Իսկ ավելի հարմար մարդ, քան Կարեն Կարապետյանը, դժվար էր գտնել: Նա վստահություն է վայելում ՌԴ-ում»,- այսօր «Տեսակետ» ակումբում ասաց պարոն Նավասարդյանը:
Ըստ նրա, ՌԴ-ն այլեւս սպասել չի ուզում. «Մոսկվայում որոշակի դժգոհություն կա Հայաստանի և Հայաստանի իշխանությունների նկատմամբ: Որպեսզի այդ ճնշումը զգան Երևանում՝ պահանջները պարտքերի վերադարձման, մասնավորապես գազի, խիստ են դրվում»:
Պարոն Նավասարդյանը նաեւ նկատեց, որ ՌԴ-ի կողմից ճնշումները ոչ միայն տնտեսական են, այլեւ՝ քաղաքական: Նա քաղաքագետ Ստեփան Գրիգորյանի ձերբակալումն ու ՌԴ-ից արտաքսումն էլ պայմանավորեց այդ ճնշումներով:
Կարդացեք նաև
Անդրադառնալով ԵԱՀԿ ՄԻնսկի ամերիկացի համանախագահ Ջեյմս Ուորլիքի հայտարարությանը՝ ԼՂ կարգավիճակ-տարածքների դիմաց, ասաց, որ նա նոր բան չի ասել. «Այլ բան չէր էլ կարող ասել, ցանկացած միջնորդ, որը խոսելու է ԼՂ խնդրի խաղաղ կարգավորման մասին, քիչ տարբերություններով, բայց նույն բանաձեւն է առաջարկելու: Այսինքն, տարածքներ՝ կարգավիճակի դիմաց: Սպասել, որ որեւէ մեկ միջնորդի դերակատարություն ստանձնող այլ բան է ասելու, այդպիսի առաջարկություններն ու լուծումներն իրատեսական չեն: Նա սկզբունքն ասաց, բայց դա չի նշանակում, որ հենց վաղը պետք է կիրառվի»:
Պարոն Նավասարդյանը չշրջանցեց նաեւ Ուորլիքի հայտարարության այն հատվածը, որը վերաբերում էր հակամարտության կողմերին ԱՄՆ-ի՝ սահմանափակ քանակությամբ զենք վաճառելուն՝ ի տարբերություն ՌԴ-ի:
«Հայտարարությունը Արեւմուտքի ու ՌԴ-ի այսօրվա առճակատման համատեքստում է, ԼՂ խնդիրը գտնվում է այդ հակամարտության ընդհանուր շրջանակներում… սա լավ է այն առումով, որ չկա համախմբված ճնշում ՀՀ վրա, որ միակողմանի զիջումների գնա, վատ է այն իմաստով, որ իրավիճակը մնում է սուր ու վտանգավոր, որտեղ խաչվում են աշխարհաքաղաքական շահերը, միշտ վտանգ կա պատերազմի ու բռնությունների»:
Արփինե ՍԻՄՈՆՅԱՆ
