Եվրահանձնաժողովի նախագահ Ժան-Կլոդ Յունկերի՝ ԵՄ միասնական բանակ ստեղծելու ծրագրերը տագնապ են առաջացրել Արևելյան Եվրոպայի երկրներում:
Բրիտանական Times պարբերականը գրում է, որ արևելաեվրոպական երկրները՝ Լիտվան, Լատվիան, Էստոնիան, և նրանց աջակցող Լեհաստանը պատրաստվում են «քննադատել ԵՄ միասնական բանակի ծրագիրը», որը, նրանց կարծիքով, «խաթարում է Ռուսաստանի դեմ ՆԱՏՕ-ի եվրոպական պաշտպանությունը»:
«Մենք շատ սկեպտիկորեն ենք ընդունում ԵՄ միասնական բանակ ստեղծելու գաղափարը»,- ասել է Լատվիայի արտգործնախարար Էդգար Ռինկևիչը:
Նրա խոսքով՝ Յունկերի ծրագիրը հակասում է ՆԱՏՕ-ին, մինչդեռ երկրները, ընդհակառակը, պետք է հզորացնեն Հյուսիսատլանտյան դաշինքի ռազմական ներկայությունը բալթյան երկրներում և Լեհաստանում:
Կարդացեք նաև
Ֆրանսիան և Գերմանիան պաշտպանում են համաեվրոպական ռազմական դոկտրինա մշակելու նախաձեռնությունը, մասնավորապես ԵՄ քաղաքացիական և ռազմական գործողությունների միասնական հրամանատարական շտաբի, արբանյակային հսկողության ընդհանուր համակարգերի ստեղծումը:
Իրենց հերթին «չեզոք երկրների»՝ Իռլանդիայի, Ավստրիայի, Շվեդիայի, Ֆինլանդիայի, քաղաքական գործիչները մտավախություն են հայտնել, որ համընդհանուր եվրոպական բանակն իրենց կարող է ներքաշել զինված հակամարտությունների մեջ, գրում է թերթը:
Պատրաստեց՝ Վիկտորյա ԱՆԴՐԵԱՍՅԱՆԸ
