Ինչպես հայտնի է՝ Գյումրու Վարդան Աճեմյանի անվան դրամատիկական թատրոնի անձնակազմի աղմկոտ, հրապարակային բողոքներից հետո երեկ տնօրենի ժամանակավոր պաշտոնակատար է նշանակվել Թատերական գործիչների միության նախագահ Հակոբ Ղազանչյանը։
Թատրոնի անձնակազմը ոտքի էր ելել՝ դժգոհելով, որ տնօրենի պաշտոնի համար հայտարարված մրցույթը եղել է գաղտնի, ու մրցույթին մասնակցելու հայտ են ներկայացրել ոչ կոմպետենտ անձիք։ Թատրոնի մենեջեր Տիգրան Վիրաբյանն Aravot.am-ին ասաց․«Այս լուծումը Գյումրու դրամատիկական թատրոնի համար ընդունելի էր, որովհետև առաջ քաշված խնդիրը ստացավ իր լուծումը։ Եվ թեկնածուները, ընդառաջելով աճեմյանցիների հորդորին, կարողացան իրենց մեջ ուժ գտնել և թատրոնը հանել փակուղուց։
Իսկ մշակույթի նախարարությունը գտավ լուծման ճիշտ ճանապարհը, խելամիտ որոշում էր Հակոբ Ղազանչյանին նշանակել Գյումրու դրամատիկական թատրոնի տնօրենի ժ/պ, որովհետև Ղազանչյան ազգանունը այս թատրոնին շատ հարազատ է։ Նա երկար տարիներ աշխատել է այս թատրոնում որպես գեղարվեստական ղեկավար և այդ շրջանը ստեղծագործական վերելքի տարիներ են եղել։
Ղազանչյանի հեռանալուց հետո, արդեն որպես Թատերական գործիչների միության նախագահ, նույնպես սերտ համագործակցություն է եղել։ Հիմա էլ վստահ ենք, որ նրա ժամանակավոր պաշտոնակատարի երեք ամիսները մինչև նոր տնօրենի մրցույթ հայտարարելը, մենք կունենանք նորմալ աշխատանքային ընթացք։
Կարդացեք նաև
Հիմա թատրոնը իր առաջ խնդիր է դրել մեծ շուքով բացել 151-րդ թատերաշրջանը, այնուհետ, բնականաբար, Գյումրու դրամատիկական թատրոնի հանրույթը կփորձի մրցույթի հայտարարման գործընթացում ունենալ իր ներկայությունը թե՛ մրցույթը հանրային դարձնելու գործում, թե՛ համապատասխան թեկնածուների փնտրտուքի հարցում։ Գյումրու դրամատիկական թատրոնը կունենա իր որոշիչ դերը, և եթե մարդիկ կլինեն, որոնք կլինեն թեկնածուների շարքում և Գյումրու դրամատիկական թատրոնը կտեսնի որպես թեկնածու, կխնդրենք, կհորդորենք, մեր կողմից կառաջարկենք մասնակցել մրցույթին, դնել իրենց թեկնածությունը, որպեսզի թատրոնի ղեկավարումը ստանձնի բանիմաց և թատրոնից տեղյակ մարդ»,-ասաց Տիգրան Վիրաբյանը։
Նունե ԱՐԵՎՇԱՏՅԱՆ
Միանգամայն համամիտ եմ, շատ խելացի որոշում է: Բոլորիդ մաղթում եմ ստեղծագործական ձեռքբերումներ եւ բազում հաջողություններ:Շարունակեք նո՛ւյն ոգով: