Ինչպես արդեն տեղեկացրել ենք, Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանում քննվում է «Սասնա ծռեր» խմբավորման անդամ Արամ Մանուկյանի խափանման միջոց կալանքը գրավով փոխելու միջնորդությունը։
Քիչ առաջ Արամ Մանուկյանի պաշտպան Հարություն Բաղդասարյանը լրագրողներին հայտնեց, որ դատարանը մերժել է միջնորդությունը. «Դատարանը գտավ, որ Արամ Մանուկյանի կատարած գործողությունները հիմք են տալիս ողջամտորեն մտածել, որ գրավով ազատելը այս պահին հիմնավոր չէ, քանի որ թե՛ առաջին ատյանի դատարանը, թե՛ վերաքննիչ դատարանը գտել են, որ այն պայմանները, որոնցով որ կալանավորել են, դեռեւս մնացել են։ Այսինքն՝ դատարանը ողջամտորեն ենթադրում է, որ կարող է խուսափել կամ խոչընդոտել նախաքննությանը»։
Հարություն Բաղդասարյանի կարծիքով՝ ստեղծված պայմաններում ոչ ոք չէր համարձակվի Արամ Մանուկյանի նման անձանց խափանման միջոցը փոխել։
Ամի ՉԻՉԱԿՅԱՆ
