«Քննադատում եմ առաջին, երկրորդ, երրորդ նախագահներին, վարչապետերին, բաց դա քննադատության մի մասն է: Իսկ հասարակությո՞ւնն ինչ խնդիր է դրել իր առաջ` իշխանություն փոխել, իշխանությունից վրեժ լուծել…Ուրիշ խնդիր հասարակությունը չի դրել»,-դժգոհում է Հանրային խորհրդի նախագահ, ՀՀ նախկին վարչապետ Վազգեն Մանուկյանը:
Այսօր Մամուլի ազգային ակումբում նա նշեց, որ իշխանափոխության հարցը դրվում է առավոտից երեկո, երբեմն` նաեւ գիշերվա կեսին. «Տպավորություն է, որ ամեն ինչ լավ կլիներ, եթե իշխանությունը փոխվեր: Նայում եմ ընդդիմության մարդկանց, մտածում եմ` որ գան իշխանության, ի՞նչ են անելու…Գիշեր-ցերեկ այդ հարցն է: Իշխանության ազդեցությունը հասարակական կյանքի վրա գերագնահատված է: Հասարակությունը մեղքը դնում է միայն այդ պահի իշխանության վրա»:
Վազգեն Մանուկյանը միաժամանակ փաստեց, որ տարեցտարի քաղաքացիական հասարակության ինստիտուտը զարգանում է. «Ժամանակն է, որ հասարակությունը եւ իշխանությունը մտածեն փոփոխությունների մասին: Ապրիլյան պատերազմը եւ վերջին իրադարձությունները ցույց տվեցին, որ ձգտում կա փոփոխությունների, իսկ թե որքան համարձակ կկատարվեն դրանք` դժվարանում եմ ասել»:
Լուիզա ՍՈՒՔԻԱՍՅԱՆ
