Այսօր կայացած ՀՀ կառավարության նիստում Երևանի քաղաքապետ Տարոն Մարգարյանի կողմից ներկայացված «Տեղական տուրքերի և վճարների մասին Հայաստանի Հանրապետության օրենքում փոփոխություններ և լրացումներ կատարելու մասին» ՀՀ օրենքի նախագիծն արժանացել է գործադիրի հավանությանը:
Հարկ է նշել, որ սույն օրենքի նախագիծն ուղղված է փոքր և միջին ձեռնարկատերերի համար գործունեության ավելի բարենպաստ պայմաններ ստեղծելուն: Օրենքի ընդունման արդյունքում, մասնավորապես, ոգելից և ալկոհոլային խմիչքի, ծխախոտի վաճառքի, ինչպես նաև հանրային սննդի կազմակերպման և իրացման թույլտվության համար տեղական տուրքի դրույքաչափերը կսահմանվեն ըստ տնտեսվարող սուբյեկտի զբաղեցրած տարածքի չափերի: Նշենք, որ այսօր գործող օրենքով որևէ տարբերակում չկա մեծ կամ փոքր օբյեկտի միջև:
Որպես առանձնահատկություն հարկ է նշել, որ մայրաքաղաքում կիրառվում է նաև տեղական տուրքերի վճարման գոտիավորման սկզբունքը, ինչն իր հերթին հնարավորություն է տալիս տեղական տուրքի վճարման տեսանկյունից տարանջատել մասնավորապես կենտրոնում և ծայրամասերում, ինչպես նաև կենտրոնական և երկրորդական փողոցներում գործունեություն ծավալող օբյեկտները:
Հարկ է նաև նշել, որ օրենքի ընդունման արդյունքում Երևանում ոգելից խմիչքի և ծխախոտի վաճառքի թույլտվություն ունեցող մոտ 4500 օբյեկտներից շուրջ 3000-ը տեղական տուրքը կվճարեն ավելի ցածր դրույքաչափով: Հավելենք, որ վերոնշյալ օրենքում առաջարկված փոփոխությունը տարիներ շարունակ սպասված է եղել փոքր և միջին ձեռնարկատերերի կողմից:
Կարդացեք նաև
Երևանի քաղաքապետարանի տեղեկատվության և հասարակայնության հետ կապերի վարչություն
