ԱԺ-ում քննարկվում է «Մաքսային կարգավորման մասին» ՀՀ օրենքում փոփոխության նախագիծը: Մաքսային կարգավորման մասին օրենքի շրջանակներում ապրանքների ներմուծման եւ արտահանման ժամանակ տնտեսվարող սուբյեկտները ստիպված են լինում դիմել մաքսային միջնորդի ծառայություններից օգտվելու համար, ինչը հաճախ առաջացնում է մի շարք դժվարություններ՝ քաշքշուկ եւ ֆինանսական բեռ:
Նախագիծը ներկայացնող էկոնոմիկայի նախարարի պաշտոնակատար Արծվիկ Մինասյանն ասաց, որ առաջարկում են հանել պարտադիր պահանջը եւ թույլ տալ, որ տնտեսվարողներն իրենք ընտրեն՝ ինքնահայտարարագրո՞ւմ են, թե՞ դիմում են մաքսային բրոքերին:
Արծվիկ Մինասյանն ասաց, որ երկրորդ կարգավորումը վերաբերում է փոքր սուբյեկտներին, որոնք տեղափոխում են մինչեւ 200 եվրո արժեքով գույք, դրանք կլինեն կատալոգներ, միկրոսարքավորումներ եւ այլն: Գործող օրենքով նման ապրանքներ ներմուծելիս մարդիկ պետք է 6500 դրամի չափով մաքս վճարեին: Ստացվում է, որ երբ անձն ուզում է 1 գիրք տեղափոխել, որի արժեքն է 5000 դրամ, ստիպված 6500 դրամի մաքս էր վճարում: Առաջարկվում է ազատել մինչեւ 200 եվրո արժողությամբ ապրանքների տեղափոխումը մաքսավճարից՝ առանց քանակական եւ ժամկետային սահմանափակման: Խոսքը վերաբերում է մեկ փոխադրողից իրականացվող փոխադրմանը մեկ ստացողին եւ մեկ տրանսպորտային փաստաթղթով:
Արծվիկ Մինասյանն ասաց, որ այս փոփոխություններից բյուջեի միջոցները չեն պակասելու, բրոքերային ծառայության գումարը մտնում էր առանձին սուբյեկտի գրպանը, իսկ 6500 դրամ մաքսավճարը՝ արտաբյուջետային հաշվի մեջ էր մտնում: Թեւան Պողոսյանը երբ հարցրեց՝ կառավարություն է փոխվել, գուցե պետք չի՞ դեռ նախորդ կառավարության նախագծերն ընդունել՝ Արծվիկ Մինասյանը չհամաձայնեց . «Պետք է ոգեւորված պաշտպանեք այս փոփոխությունը, որովհետեւ սա հիմնարար փոփոխություն է եւ սրանով մենք էականորեն պաշտպանում ենք բիզնես միջավայրը»:
Կարդացեք նաև
Այն մտավախությունը, որ գործարարները հնարավոր է իրենց ապրանքները մինչեւ 200 եվրոյի սահմաններում բաժանեն ու անցկացնեն՝ առանց մաքսավճարի, ըստ Արծվիկ Մինասյանի, չկա, քանի որ եթե որեւէ անձ օրական երկու-երեք անգամ կնախընտրի սահմանն անցնել ու հատել, ուրեմն նրանից ակտիվ տնտեսվարող հնարավոր չէ պատկերացնել:
Հռիփսիմե ՋԵԲԵՋՅԱՆ
Մի հատ ցույց կտա՞ք, օրենսդրական էն դրույթը, որով սահմանվում ա, որ 201 եւրո արժողության ապրանքը պիտի մաքսազերծվի: Չնայած եթե փոփոխություն են ուզում մտցնեն, նշանակում ա, որ 200 եւրոյանոցի համար հիմա էլ պիտի մաքս վճարվի: Էս գիտելիքներով ե՞ք, երկիր ղեկավարում:
Հ.Գ. Մաքսազերծումը ամենաահեթեթ վճարներից ա, որ դեռ վճարում ա մարդկությունը ավազակների ժամանակներից սկսած: