«Ուշադրություն դարձնելո՞ւ եք ՀՀ հեռուստաալիքներին, մասնավորապես Հանրայինի եթերի անաչառության, օբյեկտիվության, հավասար տեղեկատվության տրամադրմանը, միջոցներ ձեռնարկելո՞ւ եք դրա դեմ, թե՞ ոչ, խստագույնս հետեւելո՞ւ եք, թե՞ ոչ»,- այսօր ԱԺ-ում ԲՀԿ խմբակցության պատգամավոր Տիգրան Ուրիխանյանը ՀՌԱՀ անդամի թեկնածու Տիգրան Հակոբյանին այսպիսի հարց ուղղեց:
Տիգրան Հակոբյանն ասաց, որ Հանրային խորհուրդն է դրանով զբաղվում եւ ՀՌԱՀ-ը միայն ոչ պետական հեռուստաընկերություններով է զբաղվում, չնայած այդ խնդիրն առկա է նաեւ մյուս հեռուստաընկերություններում:
Նա ասաց, որ պետք է ՀՌԱՀ-ը հետեւի բազմակողմանի եւ օբյեկտիվ տեղեկատվության տարածմանը: Թե ինչքանով է դա ներկայումս լինում՝ դժվարացավ ասել. «Խոսքի բազմազանություն ու անաչառություն ընդհանրապես չի կարող ապահովել մի լրատվամիջոց: Դա ապահովում է ամբողջ համակարգը: Ես կարծում եմ, մի քանի գաղափար ունենալ գլխում շիզոֆրենիայի պես մի բան է: Մի հեռուստաընկերություն կարող է դավանի ազատական գաղափարներ, մյուսը՝ սոցիալիստական, ազգայնական եւ այլն: Ազգաբնակչությանը հնարավորություն տալ ընտրել ինֆորմացիան, փորձել բազմազանությունից հստակեցել՝ ինչ-որ չափով ՀՀ-ում ապահոված է»:
Տիգրան Ուրիխանյանը հարցրեց, թե ընտրվելու դեպքում կպարզե՞ք, թե ով է արգելել «Տիգրան Ուրիխանյանին, բացառությամբ մեկ հեռուստաալիքի՝ բոլոր հաղորդումներից՝ լրատվական, տեղեկատվական՝ զրկելու մասին: Կպարզե՞ք ով է հրահանգել, կարգադրել եւ իրականացրել»:
Կարդացեք նաև
Տիգրան Հակոբյանը պատասխանեց. «Կփորձեմ պարզել, հարցաքննության, լրագրության ունակություններ ունեմ: Եթե այդպիսի բան կա՝ ձեզ անպայման կտեղեկացնեմ»:
Հռիփսիմե ՋԵԲԵՋՅԱՆ
