«Թրանսփարենսի Ինտերնեյշնլ» ՀԿ ղեկավար Վարուժան Հոկտանյանի համոզմամբ, գլխավոր դատախազի թեկնածու Արթուր Դավթյանը կոռուպցիայի դեմ կպայքարի ուժերի ներածի չափով:
«Տարբեր մանր ձկների կբռնի, իհարկե, եթե վերեւից լրջագույն փոփոխություններ լինեն. իրենք էլ կսկսեն ավելի լուրջ աշխատել, խոշոր ձկների հետեւից կընկնեն, գլխից կսկսեն բռնել խոշորներին, բայց սպասելիք չունեմ, որ նույն դատախազությունը կանի մի բան, որը դուրս կլինի համակարգի տրամաբանությունից: Իսկ համակարգը անում է ամեն ինչ, որ կոռուպցիան մեր կյանքում հնարավորինս մեծ դեր խաղա, միշտ մեր մաշկի վրա զգանք»,- Aravot.am-ին ասաց պարոն Հոկտանյանը:
Ըստ նրա, Գեւորգ Կոստանյանը շատ ավելի խորքային էր տիրապետում կոռուպցիոն իրավիճակին. «Եկեք հիշենք՝ որտեղից եկավ Կոստանյանը:
Նա մինչեւ այդ հակակոռուպցիոն մոնիտորինգային հանձնաժողովի նախագահն էր, ի տարբերություն ներկայիս թեկնածուի, նա շատ ավելի խորն էր տիրապետում իրավիճակին: Բայց մի պետական մարմնով գարուն չի գալիս, նույնիսկ եթե այդ պետական մարմինը որոշի լուրջ պայքարել, ի վերջո, դա համակարգ է, եւ համակարգը պետք է փոխվի: Ինչքան էլ խոստումներ տան, շատ քիչ արդյունքներ կարող են լինել, լինի ներկայիս Դավթյանի, թե Կոստանյանի, թե Աղվան Հովսեփյանի դեպքում:
Կարդացեք նաև
Սպասել, որ կլինեն ինչ-որ հերոսներ, վառ անհատներ, որոնք, ընդհանուր իրավիճակից ելնելով, ինչ-որ քայլերի կգնան, սա հայաստանյան իրականության հետ չի բռնում»:
Պարոն Հոկտանյանի խոսքով, վերջին տարիների հակակոռուպցիոն պայքարը արդյունք չի տվել. «Միջազգային տարբեր կազմակերպությունների ուսումնասիրությունները ցույց են տալիս, որ իրավիճակի որակական բարելավում չկա, լճացում է»:
Իսկ այն, որ դատախազությունն ունի բավարար լիազորություն կոռուպցիայի դեմ պայքարը ուրիշ հարթություն տեղափոխելու համար, ինչպես պնդել էր, գլխավոր դատախազի թեկնածուն, պարոն Հոկտանյանը չհերքեց, բայց. «Լիազորություն որ ունի, դրանից ինչ է փոխվում, էնքան լիազորություն կարող է ունենալ: Խնդիրն այն է, թե այդ լիազորությունները կօգտագործվե՞ն, թե՞՝ ոչ: Արթուր Դավթյանը նորություն չասաց, որ լիազորություններ ունեն, թե չէ ով ասաց՝ լիազորություն չունեն»:
Արփինե ՍԻՄՈՆՅԱՆ
