Այսօր Նուբարաշեն քրեակատարողական հիմնարկից բնակության վայրից չհեռանալու մասին ստորագրությամբ ազատ արձակվեց Հիմնադիր խորհրդարանի համակիր, օպերատոր Վահագն Ղումաշյանը:
Նա կալանավորվել էր 2016 թվականի հուլիսի 29-ին՝ ժամը 22.30-ի սահմաններում, Էրեբունի և Նուբարաշեն վարչական շրջանների Սարի թաղ թաղամասում մի խումբ անձանց կողմից զանգվածային անկարգություններ կազմակերպելու և կատարելու դեպքի առթիվ հարուցված քրեական գործի շրջանակներում:
Սակայն Վահագն Ղումաշյանը պնդում է, որ անգամ Սարի թաղում չի եղել: Aravot.am-ի հետ զրույցում Վահագն Ղումաշյանն իր կալանավորումն ու իր դեմ մեղադրանքը համարեց շինծու ու մանրամասնեց. «Փորձում էին անգամ Հիմնադիր խորհրդարանի սովորական համակիրներին մեկուսացնելով` մարդկանց վախեցնել, սպառնալ: Անկեղծ ասած` ամեն վայրկյան սպասում էի, որ ինձ հետ նման բան կպատահի»:
Վահագն Ղումաշյանը պատմեց, որ երկու ոստիկան ցուցմունք են գրել, թե իբր մի անձի բերան ենթարկելուց իրենք տեսել են, որ իբր Վահագն Ղումաշյանն առարկաներ է նետում ոստիկանների ուղղությամբ:
Կարդացեք նաև
Նա 43 օր գտնվել է անազատության մեջ, բանտային պայմաններից դժգոհ է, բայց գոհ է խցում եղած կալանավորների և ՔԿՀ-ի անձնակազմի վերաբերմունքից. «Անկախ նրանից` ինչի համար են ազատազրկված, նրանք էլ մարդիկ են: Երբ մտել եմ բանտախուց, այդ ողջ օրը ոչինչ չէի կերել, իմ առաջ ճաշ են դրել, որ ուտեմ, իսկ երբ մենակ չէի ուզում ուտել, կողքս նստեց ազատազրկվածներից մեկը, որ չնեղվեմ»:
Վահագն Ղումաշյանը պնդեց, որ շարունակելու է լինել ՀԽ համակիր. «Այն ժամանակ կամավոր հիմունքներով ՀԽ-ին օգնում էի: Անկախ նրանից` կշարունակեմ դա անել, մնալու եմ նրանց համակիր և աջակից»:
Նա չի բացառում նաև, որ իրեն կալանավորելը կարող էր թյուրիմացության արդյունք լինել. Երկու ոստիկանները նմանեցրել են իրեն ինչ-որ մեկին: Սակայն դա քիչ հավանական է համարում. «Կարծում եմ` այդ ոստիկաններին ասել են Ղումաշյան Վահագնի վրա գրեք, շառ արեք, տենց էլ արել են: Իսկ եթե այդ երկուսը տեսել են ինձ, գուցե տեսողական շիզոֆրենիա ունեն: Եթե քննությունը շարունակվի, միջնորդելու եմ` նրանց շիզոֆրենիան ստուգեն»:
Տաթև ՀԱՐՈՒԹՅՈՒՆՅԱՆ
