«Նոր ձեւավորվելիք կառավարությունից ամենամեծ սպասումն այն է, որ կյանքի կկոչվեն խոստումները` տնտեսական մենաշնորհների վերացում, կոռուպցիայի դեմ պայքար, սակայն դրանք, ցավոք, իրականություն չեն դառնա»: Այս մասին այսօր «Փաստարկ» մամուլի ակումբում ասաց տնտեսագետ Վահագն Խաչատրյանը:
Նրա դիտարկմամբ` Հայաստանի տնտեսության խնդիրը ոչ թե տնտեսական, այլ քաղաքական դաշտում է. «Հարցերի լուծումները քաղաքական որոշումներ են պահանջում: Փոփոխություններ չեն լինի, որովհետեւ գործող իշխանությունը կարող է գոյատեւել միայն այն դեպքում, երբ կա կոռուպցիա, մենաշնորհ: Այս իշխանությունն իրեն վերարտադրելու համար նոր համակարգի կարիք չունի, գործող համակարգն արդյունավետ է նրա համար»:
Տնտեսագետը դժվարացավ Հայաստանի տնտեսական իրավիճակը գնահատել, քանի որ, ըստ նրա, պաշտոնական թվերն իրականությանը չեն համապատասխանում. «Երբ ասում են, որ լոլիկի արտահանումը 20 հազար անգամ ավելանում է, դա շատ տարօրինակ է, որովհետեւ արտադրության փոփոխություն չկա, ներմուծում չկա: Խորանալով` հասկանում ես, որ այդ արտահանման ծավալի աճի մեջ մեծացել է ոչ թե տեղական արտադրության դերը, այլ «աճպարարությունը», որի մասին մեզ չեն ասում: Եթե ասեն, նշանակում է` հարեւան երկրների հետ կունենանք խնդիրներ, որովհետեւ այնտեղ այդ ապրանքների ներմուծումն արգելված է»:
Կարդացեք նաև
Խաչատրյանի համոզմամբ` նոր Կառավարության առաջին խնդիրը պետք է լինի նոր թվեր եւ տնտեսական իրական պատկերը ներկայացնելը. «Օրինակ, հայտարարեն, որ հարկահավաքությունը պակասել է»:
Լուիզա ՍՈՒՔԻԱՍՅԱՆ
