«Փարիզյան հանդիպումը չի կայանում, որովհետեւ բանակցային գործընթացում չկա առաջխաղացում»,-«Փաստարկ» մամուլի ակումբում այսօր անդրադառնալով ավելի վաղ Փարիզում նախանշված Սարգսյան-Ալիեւ այդպես էլ չկայացած հանդիպմանը, ասաց «Կովկաս» ինստիտուտի փոխտնօրեն, քաղաքագետ Սերգեյ Մինասյանը:
Նրա դիտարկմամբ` Փարիզում Արցախյան հակամարտության կողմերը պետք է խոսեն շփման գծում վերահսկողության մեխանիզմների ներդրման մասին, ինչին դեմ է Ադրբեջանը. «Այս թեմայի շուրջ Ալիեւը դժվար թե խոսի: Այսպես խնդիր է ստեղծվում` բանակցային գործընթացում քաղաքական պայմանավորվածությունների գալու առումով: Ադրբեջանը պատրաստ չէ լուրջ խոսել վստահության մեխանիզմների մասին եւ փորձում է Մադրիդյան սկզբունքների տրամաբանությունից հանել ամենակարեւոր կետը` Արցախի կարգավիճակի ձեւավորման մեխանիզմները, այդ պատճառով էլ փարիզյան հանդիպումը հետաձգվում է»:
Ըստ Մինասյանի, եթե առաջիկայում անհրաժեշտություն լինի եւ համանախագահները տեղին համարեն Սարգսյան-Ալիեւ հանդիպումը, բացառված չէ, որ Փարիզում կամ այլ տեղ այդ հանդիպումն, այնուամենայնիվ, կայանա:
Անդրադառնալով Արցախի հակամարտության կարգավորման բանակցություններում Թուրքիայի հնարավոր ներգրավվածությանը, բանախոսը նշեց, որ Թուրքիան որոշ չափով համեստացնելու է իր սպասումները` պայմանավորված ռուս-թուրքական ներկայիս հարաբերություններով:
Կարդացեք նաև
Լուիզա ՍՈՒՔԻԱՍՅԱՆ
