Ուկրաինայի «Ժողովրդական ճակատի» և «Պյոտր Պորոշենկոյի բլոկի» պատգամավորները երկրի գլխավոր դատախազություն հայց են ներկայացրել Օդեսայի նահանգապետ, Վրաստանի նախկին նախագահ Միխեիլ Սաակաշվիլիի դեմ՝ նրան մեղադրելով կազմակերպված հանցավոր խմբավորում ստեղծելու և երկրին 6.5 մլրդ գրիվենի վնաս հասցնելու մեջ:
«Միխեիլ Սաակաշվիլին հիմնել է կազմակերպված հանցավոր խմբավորում՝ Ուկրաինայի ազգային հակակոռուպցիոն բյուրոյի աշխատակիցների մասնակցությամբ: Ուստի շահերի բախումից խուսափելու համար մենք հանցագործության մասին հաղորդում ենք ներկայացրել Գլխավոր դատախազություն»,- մեջբերում է «Ուկրաինսկիե նովոստի»-ն պատգամավոր Ալենսանդր Դրոզդիկի խոսքերը:
Հայցի հեղինակները Սաակաշվիլին մեղադրում են անօրինական տնտեսվարման, պաշտոնեական դիրքի չարաշահման մեջ: Նրանց խոսքով՝ այդ գործողությունները ծանր հետևանքներ են ունեցել երկրի համար և հասցրել են ավելի քան 6,5 մլրդ գրիվենի նյութական վնաս:
Ինքը՝ Սաակաշվիլին, անհիմն է համարում այդ մեղադրանքները: Նրա կարծիքով՝ պատգամավորները ցանկանում են պարզապես իրեն հեռացնել պաշտոնից:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
