«Քաղաքացիական պայմանագիր» կուսակցությունը այսօր Ազատություն հրապարակում հանրահավաքը սկսեց ազգային օրհներգով:
Կուսակցության մամլո խոսնակ Ալեն Սիմոնյանը ասաց, որ բոլորը քննարկում են Հովիկ Աբրահամյանի հրաժարականը, նոր նախարարների նշանակումը, նոր վարչապետի թեկնածությունը. «ՀՀ-ում վարչապետ, նախարարներ փոխելով ոչ մի բան չի փոխվելու, այդ բոլոր փոփոխությունները արվում են մեկ նպատակով, որ բան չփոխվի: Այդ մարդիկ, իրենց նշանակման օրից մի շատ կարեւոր գործոն պետք է իրականացնեն՝ պետք եղած վայրում եւ ժամին պառկեն զոհասեղանին եւ փրկեն Սերժ Սարգսյանին: ՀՀ-ում որեւիցե փոփոխություն, եթե չի պարունակում Սերժ Սարգսյանի անունը՝ փոփոխություն համարվել չի կարող»:
Կուսակցության վարչության նախագահ Արայիկ Հարությունյանն էլ իր ելույթում ասաց, որ այս հանրահավաքը շատ է կարեւորում, քանի որ սրանով ազդարարում են իրենց պաշտոնական քարոզչության մասին:
Կարդացեք նաև
«Սա առաջին, լուրջ հնարավորությունն է, որ հասարակության լայն զանգվածին ներկայացնել թե ո՞վ ենք մենք, ինչո՞ւ ենք այս հրապարակում եւ առհասարակ որն է մեր նպատակը», որոնցից հիմնականները, պարոն Հարությունյանը առանձնացրեց՝ երջանիկ անհատ, հոգատար հանրություն, հզոր պետություն ունենալը:
«Այսօր, այս հրապարակում իմ եղբայրն է՝ իր 8 ամսական երեխայի հետ: Ես այս կուսակցությունում եմ, որ մեր տան փոքրը չարտագաղթի Հայաստանից ու մենք նրա մեծանալը չտեսնենք «Սկայպ»-ով, ինչը որ տեսնում են շատ համայնքների տատիկ-պապիկները»:
Ալեն Սիմոնյանը հիշեցրեց, որ «Քաղաքացիական պայմանագիր» կուսակցությունը մասնակցում է մի շարք ՏԻՄ ընտրությունների, որոնց ներկայացուցիչներից եւս մասնակցում էին հանրահավաքին:
Ելույթ ունեցավ նաեւ կուսակցության անդամ Սասուն Միքայելյանը: Նա նշեց, որ առկա տնտեսական, հոգեբանական վիճակը երկրում այնքան է սրվել, որ մեր ժողովուրդը այդ վիճակից դուրս գալու համար տեսնում է զինված ապստամբությունը.«Այս տարիների ընթացքում բոլորս ականատես ենք եղել շատ մեծ, իշխանության կողմից ձեւավորված մի շարք արհավիրքների, որը միշտ ազդել է մեր ապագա սերնդի կյանքի, ապրելակերպի վրա»:
Նա, խոսելով ազգային համաձայնության կառավարության ստեղծման մասին՝ նշեց, որ մեր իշխանությունները ուզում են պահել իրենց իշխանությունը բանդայի ձեռքում, որը ոչ մի կապ չունի մեր ժողովրդի հետ:
Անուշ ՄԱԹԵՎՈՍՅԱՆ
