Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում այսօր լսվեց «Սասնա ծռեր» խմբավորմանն օժանդակելու մեջ մեղադրվող` բեռնատարի վարորդ Խաչատուր Գիչյանի կալանքի ժամկետը երկարաձգելու միջնորդությունը, որը ներկայացրել էր քննիչը: Այն պետք է քննվեր երեկ, սակայն Գիչյանի առողջական վիճակի կտրուկ վատացման պատճառով նիստը չկայացավ:
Ինչպես Aravot.am-ի հետ զրույցում նշեց Խաչատուր Գիչյանի պաշտպանը` Տիգրան Սարգսյանը, թեեւ Գիչյանի առողջական վիճակը բավարար չէ, բայց նա կարողացել է այսօրվա նիստին մասնակցել: Քննիչի միջնորդությունը բավարարվել է. «Գտնում եմ, որ այն անհիմն է: Հիմնավորեցինք, որ ազատության մեջ գտնվելով` Խաչատուր Գիչյանը չի խուսափի քննությունից»,-ասաց Տիգրան Սարգսյանը: Այսպիսով, Խաչատուր Գիչյանը կալանքի տակ կմնա եւս երկու ամիս:
Հետաքրքրվեցինք` ինչո՞ւ են Գիչյանի ցուցմունքները տարբեր: «Նա 68 տարեկան է, առողջական խնդիրներ ունի, որոշ մանրամասներ չի հիշում: Ոչ թե ցուցմունքներում հակասություններ կան, այլ ամեն անգամ նա նոր հանգամանքներ է հիշում»,-նկատեց Տիգրան Սարգսյանը:
Խնդրեցինք մեկնաբանել նաեւ Գիչյանի կնոջ ասածը, թե «արթնացել են եւ տեսել, որ բեռնատարը չկա»: «Կնոջ մոտ անհանգստություն եւ վախ չառաջացնելու նպատակով Գիչյանը նման կերպ էր մեկնաբանել բեռնատարի «կորուստը»: Իրականում հանգամանքներն այլ են»,-պարզաբանեց Տիգրան Սարգսյանը:
Կարդացեք նաև
Լուիզա ՍՈՒՔԻԱՍՅԱՆ
