Սեպտեմբերի 10-ին Հայաստանի պետական տնտեսագիտական համալսարանում տեղի ունեցավ ապրիլյան քառօրյա պատերազմում զոհված հերոսների անվան լսարանի բացման հանդիսավոր արարողությունը: Միջոցառմանը ներկա էր ՀՀ Պաշտպանության նախարար Սեյրան Օհանյանը: Նա բուհի ռեկտոր Կորյուն Աթոյանի հետ միասին իրականացրեց անվանակոչված լսարանի հանդիսավոր բացումը:
Նախարարը ծանոթացավ լսարանին, որտեղ «Բարձունքը մերն է, տղերքը՝ չկան, տղերքն ավելի բարձրում մնացին…» վերտառությամբ ներկայացված էին քառօրյա պատերազմում հայրենիքի համար կյանքը տալով հերոսացած զինվորների լուսանկարները, պատերազմական դրվագներ և կադրեր առաջնագծից: Ծանոթության ավարտին Սեյրան Օհանյանը ՀՀ պաշտպանության նախարարության կողմից խորհրդանշական հուշանվեր հանձնեց:
Լսարանի հանդիսավոր բացման արարողությանը հաջորդեց պաշտպանության նախարարի հանդիպումը բուհի ուսանողների և պրոֆեսորադասախոսական համակազմի անդամների հետ: ՀՊՏՀ ռեկտոր Կորյուն Աթոյանն իր և բուհի անունից երախտագիտություն հայտնեց Սեյրան Օհանյանին բուհ-բանակ կապը ամրապնդելու ուղղությամբ իրականացվող ծրագրերին ցուցաբերվող մշտական աջակցության համար:
ՀՊՏՀ ուսանողական խորհրդի նախագահ Սերգեյ Խառատյանը տեսահոլովակով ներկայացրեց նախորդ՝ 2015-2016 ուսումնական տարվա ընթացքում ուսանողական խորհրդի նախաձեռնությամբ համալսարանում և համալսարանից դուրս իրականացված բազմաթիվ ռազմահայրենասիրական միջոցառումներն ու ծրագրերը:
Կարդացեք նաև
Սեյրան Օհանյանը, բարձր գնահատելով երիտասարդների ռազմահայրենասիրական դաստիարակությունը, հայտնեց. «Մեր բանակի կողքին, ի դեմս ուսանողական խորհրդի, ձևավորվել է մի նոր բանակ, որը մշտապես կանգնած է մեր կողքին և աջակցում է բոլոր հարցերում, և ես իմ երախտագիտությունն եմ հայտնում այս կառույցին»:
Այնուհետև նախարարը գերատեսչական մեդալներով, պավոգրերով և հուշանվերներով պարգևատրեց բուհի դասախոսներին և ուսանողներին:
Հանդիպման ավարտին ուսանողները հնարավորություն ունեցան նախարարին ուղղել իրենց հարցերը, որոնք առնչվում էին բանակային կյանքին, սահմանագծում տիրող իրավիճակին և այլ հարակից ոլորտներին:
Ծրագիրն իրականացվեց ՀՊՏՀ ուսանողական խորհրդի նախաձեռնությամբ Հայաստանի երիտասարդական հիմնադրամի հետ համատեղ:
Հայաստանի երիտասարդական հիմնադրամի հասարակայնության հետ կապերի ծառայություն
