BBC-ն հղում կատարելով կանադացիների կողմից կատարված հետազոտությանը եւ բենզոդիազեպինի ընդունման վիճակագրությանը՝ տեղեկացնում է, որ եթե մարդ երկար ժամանակ ընդունում է անհանգստության եւ անքնության դեմ դեղամիջոցներ, ապա ի վերջո նրան կարող է սպառնալ Ալցհեյմերի հիվանդությունը: Մարդիկ այս դեղամիջոցն ընդունել են առնվազն երեք ամիս: Ալցհեյմերի հիվանդությունը կենտրոնական նյարդային համակարգի դեգեներատիվ հիվանդություն է, որը մեծ մասամբ հանդես է գալիս 65-անց մարդկանց մոտ։ Այն նկարագրվում է որպես գլխուղեղի նյարդային բջիջների վրա ազդող արագ զարգացող, քայքայիչ խանգարում, որը հանգեցնում է հիշողության ու խոսելու հմտության կորստի եւ վարքի փոփոխության։
Ըստ պաշտոնապես տրվող խորհուրդների՝ նշված դեղամիջոցը պետք է ընդունել 8-12 շաբաթ: Սակայն որոշ մարդիկ ինքնուրույն երկարացնում են բուժումը՝ առանց իմանալու, որ երեք ամիսն ամենավերջին ժամկետն է: Բորդոյի համալսարանի աշխատակիցները, ովքեր կատարել են հետազոտությունը, առայժմ չեն պարզել, թե որտեղ է թաքնված այդ կապի պատճառը:
Ընդհանուր առմամբ, համալսարանի աշխատակիցները հետազոտել են Ալցհեյմերի հիվանդության 2000 դեպք՝ 66 տարեկանից բարձր անձանց մոտ: Բոլոր տարեց մարդիկ ընդունում էին բենզոդիազեպին: Նրանց վիճակը համեմատվել է հսկիչ խմբի հետ (նույն տարիքի մոտավորապես 7000 առողջ մարդ): Հետազոտության հիմնախնդիրն այն էր, որ երբեմն հենց Ալցհեյմերի հիվանդությունն է առաջացնում քնի եւ անհանգստության խնդիրներ: Հետեւաբար, չի բացառվում, որ դեղամիջոցի ընդունումն է հանդիսանում հետեւանք: Սակայն, ամեն դեպքում, դեղի երկարաժամկետ ընդունումը վնասակար է:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
09.09.2016
