Ինսուլտը գլխուղեղի ֆունկցիայի հանկարծակի խանգարում է, որն առաջանում է գլխուղեղի արյան շրջանառության խանգարման հետեւանքով: Ինսուլտի նյարդաբանական ախտանիշներն ի հայտ են գալիս հանկարծակի: Թթվածնի մատակարարման դադարեցման պայմաններում նյարդային բջիջները մահանում են 5 րոպեի ընթացքում:
Լինում է, որ չիմանալով ինսուլտի նշանները, սխալ օգնություն է հասցվում տուժածին, որի հետեւանքով էլ ավելի է վատանում տուժողի վիճակը: Որպեսզի իմանալ եւ կարողանալ օգնության ձեռք մեկնել այն մարդուն, որի մոտ ինսուլտային վիճակ է, նախ պետք է տարբերել, որ կախված ախտահարման օջախից՝ ինսուլտի նշանները կարող են լինել թուլությունը, երկտեսությունը, զգայունության, կողմնորոշման կամ խոսքի խանգարումը, շփոթվածությունը:
Բժիշկները խորհուրդ են տալիս, որ եթե տուժողի մոտ նկատել եք ինսուլտի ախտանիշներ կամ նշաններ, ապա անհապաղ կանչեք շտապօգնություն եւ դեպքի վայր ժամանած բժիշկներին նկարագրեք ախտանիշները:
Ինսուլտի դեպքում ժպիտը թեք է՝ դեմքի կողմերից մեկը չի ենթարկվում մարդուն, շրթունքի անկյունը թեքված է ոչ թե վերեւ, այլ՝ ներքեւ, հիվանդը խոսում է կմկմալով՝ հարբած մարդու նման, իսկ ձեռքերը հավասարաչափ չեն բարձրացնում, ախտահարված կողմի ձեռքը միշտ ավելի ներքեւ է: Լեզուն թեք է կամ ոչ կանոնավոր ձեւի, եւ ընկնում է այս կամ այն կողմ:
Doctors.am-ում նշվում է ինսուլտի ախտանիշների ճանաչման 3 հիմնական հնարքները`
Խնդրեք հիվանդին ժպտալ:
Խնդրեք հիվանդին խոսել: Խնդրեք արտաբերել պարզ նախադասություն: Օրինակ՝ «Դրսում արեւ է»:
Խնդրեք բարձրացնել երկու ձեռքերը:
Պետք է հիշել, որ ինսուլտի ժամանակ չի կարելի փորձել սեփական ուժերով լուծել խնդիրը: Մասնագետները խորհուրդ են տալիս` չմոռանալ նաեւ հիվանդի հոգեբանական աջակցության մասին:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
09.09.2016
