Սեպտեմբերի 18-ին Տավուշի մարզի Նոյեմբերյանի, Իջեւանի, Բերդի տարածաշրջանների համայնքներում ՏԻՄ ընտրությունների են կայանալու: Նոյեմբերյան քաղաքը եւ Ադրբեջանին սահմանակից 8 գյուղերը միավորող Նոյեմբերյան համայնքի ավագանու 15 տեղին հավակնում էր 36 թեկնածու:
Նոյեմբերյանում տեղակայված Տավուշի մարզի թիվ 40 ընտրատարածքային ընտրական հանձնաժողովից տեղեկացանք, որ ավագանու 3 թեկնածու, ովքեր սահմանամերձ Բերդավան գյուղի բնակիչ են, հանել են իրենց թեկնածությունը: Այսպիսով՝ խոշորացված Նոյեմբերյան համայնքի ավագանու 15 տեղին հավակնում է 33 թեկնածու:
Տավուշի մարզի ոչ մեծ համայնքներից ավագանու թեկնածուների մեջ կան անձինք, ովքեր գրագիտության խնդիր ունեն: Թիվ 40 ԸԸՀ-ից իմացանք, որ ավագանու թեկնածու առաջադրվելու համար պահանջվող փաստաթղթերը լրացնելու ժամանակ թեկնածուներից մեկը ընտանեկան դրության մասին հարցի դիմաց գրառել է «ամուսնացված», մեկ այլ թեկնածու՝ «լարված», մեկ ուրիշը՝ «նորմալ»:
Ոսկան ՍԱՐԳՍՅԱՆ
