Վրաստանը բոլոր գործիքներն ունի՝ Հյուսիսատլանտյան դաշինքի անդամակցությանը պատրաստվելու համար: Այսօր Թբիլիսիում նման հայտարարություն է արել ՆԱՏՕ-ի գլխավոր քարտուղար Յենս Սթոլթենբերգը Վրաստանի վարչապետ Գեորգի Կվրիկաշվիլիի հետ համատեղ մամուլի ասուլիսում:
«Մենք լրացուցիչ միջոցներ ենք ձեռնարկել՝ մեր առանց այն էլ խորը համագործակցության մեխանիզմները խորացնելու համար: Որպես ասպիրանտ-երկիր՝ Վրաստանը բոլոր գործիքներն ունի՝ ՆԱՏՕ-ի անդամակցությանը պատրաստվելու համար: Իսկ ՆԱՏՕ-ն կաջակցի Վրաստանին այդ ճանապարհին»,- ասել է Սթոլթենբերգը, որի խոսքերը մեջբերում է «Գրուզիա Օնլայնը»:
Պատասխանելով այն հարցին, թե ինչ դերակատարություն ունի այդ հարցում Ռուսաստանը, Սթոլթենբերգն ասել է, որ «ՆԱՏՕ-ի դռները բաց են», և ցանկացած անկախ պետության անդամակցության հարց «որոշում են ՆԱՏՕ-ի անդամ երկրները, և ոչ մի այլ երկիր իրավունք չունի միջամտել այդ գործընթացին»:
Իր հերթին Վրաստանի վարչապետը նշել է, որ Վրաստանը և Հյուսիսատլանտյան դաշինքը ակտիվորեն համագործակցում են ռազմական ոլորտում: «Այս հանդիպումը Վարշավայում ՆԱՏՕ-ի գագաթաժողովին մեկնարկած կարևորագույն գործընթացի մասն է, որի նպատակն է բարձրացնել Վրաստանի պաշտպանունակությունը և երկիրը պատրաստել դաշինքին անդամակցությանը: ՆԱՏՕ-ին միանալը Վրաստանի բնակչության հաստատուն կամքն է»,- հայտարարել է Կվիրիկաշվիլին:
Կարդացեք նաև
Հիշեցնեք, այսօր Վրաստան է այցելել ՆԱՏՕ-ի գլխավոր քարտուղար Յենս Սթոլթենբերգը՝ մասնակցելու դաշինքի Հյուսիսատլանտյան խորհրդի նիստին:
Պատրաստեց՝ Վիկտորյա ԱՆԴՐԵԱՍՅԱՆԸ
