ՀՀ վարչապետ Հովիկ Աբրահամյանի հրաժարականի եւ նոր վարչապետի թեկնածուի՝ «Հայռուսգազարդ»-ի նախկին տնօրեն Կարեն Կարապետյանի մասին լուրերը հանրապետականները ոչ հերքում են, ոչ հաստատում: Լրատվամիջոցները կանխատեսում են՝ վաղը ՀՀԿ խորհրդի եւ գործադիր մարմնի նիստին կորոշվի՝ Աբրահամյանի հրաժարականի եւ Կարապետյանի նշանակման հարցը:
Կարեն Կարապետյանը Երեւանի քաղաքապետ է եղել շատ կարճ ժամանակահատված՝ 2010 թվականի դեկտեմբերի 17-ից մինչեւ 2011 թվականի հոկտեմբերի 28-ը:
Նշենք, որ նախկին վարչապետ Տիգրան Սարգսյանից հետո Հովիկ Աբրահամյանը ԲՀԿ-ի համար ցանկալի վարչապետ է: Թե ինչ կարծիք ունեն ԲՀԿ-ականները Աբրահամյանի փոփոխության մասին Կարապետյանով, փորձեցինք ճշտել ԲՀԿ-ականներից: ԲՀԿ ղեկավար Նաիրա Զոհրաբյանը հրաժարվեց գնահատական տալ, նշելով՝ լուրերը չեմ մեկնաբանում:
Իսկ ԲՀԿ-ական, տնտեսագետ Վարդան Բոստանջյանը հիացական խոսքեր ասաց Կարեն Կարապետյանի մասին: Բոստանջյանը Կարապետյանների ընտանիքին, ինչպես ինքն ասաց, ճանաչում է գրեթե 40 տարի. «Նրա մոր հետ դասախոսություն եմ կարդացել ժողինստիտուտում, հորն էլ եմ ճանաչում: Կարեն Կարապետյանին ճանաչում եմ Սովետի ժամանակներից՝ հաշվողական կենտրոնում աշխատած ժամանակներից մինչեւ շուկայական հարաբերությունների անցումը: Բարձր մակարդակի անձնավորություն է՝ գիտելիքներով, կառավարման սկզբունքներով: Կարապետյանների ընտանիքի մակարդակը շատ բարձր է»:
Կարդացեք նաև
Aravot.am-ի այն հարցին՝ արդյոք հրաշալի գիտելիքները բավարար են, որպեսզի Հայաստանում, հատկապես տնտեսությունում ռադիկալ փոփոխություններ կատարվեն, Բոստանջյանն այսպես պատասխանեց.«Հենց այսպիսի մարդիկ պետք է ամբողջ ռեֆորմներն անեն»:
Հովիկ Աբրահամյանը չի՞ կարողանում անել, մեր այս հարցին էլ Բոստանջյանը պատասխանեց.« Ոչ, չեմ կարծում, ոչ թե չկարողացավ, այլ, երևի, չունեցավ … Հայաստանի Հանրապետությունում կառավարման համակարգն այնպիսին է դարձել, որ որոշում ընդունողները ճակատային ձեւով պետք է որոշում կայացնեն: Այստեղ բացառված չէ նաեւ Կարապետյանի գործոնը: Մի մոռացեք, որ նա, որպես քաղաքապետ, շուտափութորեն հեռացավ, ուրեմն պետք է մտածել՝ իսկ ինչո՞ւ»:
Կարեն Կարապետյանը կկարողանա՞ պայքարել, ընդդիմադիրների ասած՝ քրեաօլիգարխիկ համակարգի, մենաշնորհների դեմ, արդյոք բարձր մակարդակ ունենալը բավարար է մեր երկրում այս երեւույթները վերացնելու համար, մեր այս հարցին էլ Բոստանջյանը պատասխանեց.«Մենաշնորհներն ու ոչ ցանկալի զարգացումները, այդ համակարգը, դրա դեմ մենակով չեն պայքարում, պետք է համակարգային, թիմային փոփոխություն լինի: Այդ թիմի մեջ ընդգրկեն նաեւ մարդիկ, որոնք ինչ-որ ձեւով այդ նույն քրեաօլիգարխիկ համակարգում են: Հանրամարդակային պատմությունը ցույց է տալիս, որ միայն ու միայն համախոհների պայմանավորվածությամբ եւ նրանց համատեղ ջանքերով է բացասական երեւույթների դեմ պայքար լինում: Առանձին մեկ մարդը չի կարող պայքարել մեր համակարգին բնորոշ երեւույթների դեմ»:
Թե Բոստանջյանի նշած թիմում ովքեր պետք է լինեն, որ բարեփոխումներ լինեն, նույն հանրապետականնե՞րը, ԲՀԿ անդամն ասաց. «Այդ նույն հանրապետականներից պետք է աշխատեն ազատվել: Հանրապետակաների հետ ինքս բավական մոտիկ եմ: Ասեմ ՝ այդտեղ երկրին նվիրված մարդիկ կան, պարզապես խնդիրն այն է, որ արդյոք նրանք իրավունք ունեն կիրառելու իրենց այդ ցանկությունները»:
Նելլի ԲԱԲԱՅԱՆ
