Այսօր Կենտրոն եւ Նորք Մարաշ վարչական շրջանների ընդհանուր իրավասության դատարանում լսվեց Կարո Եղնուկյանի պաշտպան, փաստաբան Տիգրան Հայրապետյանի վերաքննիչ բողոքը՝ գլխավոր դատախազի պաշտոնակատար Արմեն Հարությունյանի անգործության դեմ:
Դատական նիստին չէր ներկայացել գլխավոր դատախազի պաշտոնակատարի լիազորված դատախազը: Դատավորը հստակեցրեց Տիգրան Հայրապետյանի դիրքորոշումը, նրա բացակայութամբ նիստը շարունակե՞լ, թե՞ հետաձգել: Տիգրան Հայրապետյանի խոսքերով՝ «Եթե նա ավելի կարեւոր գործեր ունի, քան իր պաշտոնավարման հետ կապված հարցերը, ամեն դեպքում սա նույնպես հաստատում է, որ նա կոմպետենտ չի գլխավոր դատախազի համար»: Դատավորը փորձեց սաստել, որ իրավական հարցեր, իր նշանակման հիմնավորվածության հարցեր չեն քննարկվում:
Դատավորը խուսափում էր արտաբերել, որ բողոքն ուղղված է գլխավոր դատախազի պաշտոնակատարի անգործության դեմ: Նրա խոսքերով՝ փաստորեն, դատախազի պաշտոնակատարը մակագրել է այլ դատախազների, որոնք անգործություն են դրսեւորել: Տիգրան Հայրապետյանը չհամաձայնեց. «Հարգելի դատավոր, իմ բոլոր բողոքներն ուղղված են եղել հանրապետության գլխավոր դատախազի պաշտոնակատար Արմեն Հարությունյանին, ուղղակի նա մակագրել է այլ դատախազների¦:
Կարդացեք նաև
Նա ասաց, որ դատարանում վիճարկում է գլխավոր դատախազի պաշտոնակատարի անգործությունը, նախաքննական մարմնի որոշումները չեն վիճարկվում:
Տիգրան Հայրապետյանը միջնորդություն ներկայացրեց, որ հաջորդ դատական նիստին մասնակցի նաեւ Կարո Եղնուկյանը: Դատավորը որոշեց, որ հիմնավոր է միջնորդությունը եւ ասաց, որ հաջորդ նիստին կապահովի ոչ միայն քրեակատարողական հիմնարկում գտնվող Կարո Եղնուկյանի, այլեւ գլխավոր դատախազի լիազորված դատախազի մասնակցությունը, որ կողմը կարողանա իր հարցադրումներն ուղղել:
Հաջորդ դատական նիստը նշանակվեց սեպտեմբերի 16-ին, ժամը 12.30-ին:
Հռիփսիմե ՋԵԲԵՋՅԱՆ
