Սեպտեմբերի 18-ին Տավուշի մարզի Նոյեմբերյանի, Իջեւանի եւ Բերդի տարածաշրջաններում տեղի կունենան համայնքի ղեկավարի եւ ավագանու ընտրություններ: Համայնքի ղեկավար ընտրվելու համար թեժ մրցակցություն է լինելու խոշորացված Նոյեմբերյան, Այրում, Կողբ համայնքներում:
Նոյեմբերյան համայնքը ներառում է Նոյեմբերյան քաղաքը եւ Ադրբեջանին սահմանակից 8 գյուղեր: Նոյեմբերյան քաղաքում տեղակայված Տավուշի մարզի թիվ 40 ընտրատարածքային ընտրական հանձնաժողովից տեղեկացանք, որ Նոյեմբերյան համայնքի ղեկավարի թեկնածու է գրանցված 7 անձ:
Գործող քաղաքապետ. ՀՀԿ անդամ Վանուշ Ամիրաղյանը համայնքի ղեկավարի թեկնածու է առաջադրվել ՀՀԿ տեղական կազմակերպության խորհրդի որոշմամբ: Վ. Ամիրաղյանը որպես Նոյեմբերյանի քաղաքապետ պաշտոնավարել է 2002-2005թթ. եւ 2008թ.-ից մինչ օրս:
Անհատ ձեռներեց, անկուսակցական Կարեն Աբազյանը համայնքի ղեկավարի թեկնածու է առաջադրվել ինքնառաջադրմամբ:
Կարդացեք նաև
Ինքնառաջադրմամբ Նոյեմբերյան համայնքի ղեկավարի թեկնածու են առաջադրվել նաեւ Նոյեմբերյանի «Լեւոն երկրորդ» ՍՊԸ աշխատակից, Երկրապահ կամավորականների միության Տավուշի մարզային խորհրդի նախագահի տեղակալ, ՀՀԿ անդամ Արթուր Անանյանը, Բարեկամավան համայնքի ղեկավար, ՀՀԿ անդամ Գարիկ Աբազյանը, Նոյեմբերյանի նախկին քաղաքապետ (Նոյեմբերյանը ղեկավարել է 1996-2002 եւ 2005-2008թթ.), անկուսակցական Սերյոժա Ամիրաղյանը. Ոսկեպար համայնքի ղեկավար , ՀՀԿ անդամ Երվանգ Եգանյանը եւ «Լուսավոր Հայաստան» կուսակցության անդամ Գարիկ Փիրումյանը:
Ոսկան ՍԱՐԳՍՅԱՆ
