Սյունիքի մարզպետ Սուրիկ Խաչատրյանը վստահեցնում է՝ ինքն ու իր ընտանիքի անդամները կապ չունեն Գորիսում տեղի ունեցած վերջին ծեծկռտուքի հետ:
«Ես ոչ մի կապ չունեմ դրա հետ, լավ, լավ, հետո կխոսենք, հիմա զբաղված եմ»,- Aravot.am-ին շատ կարճ պատասխանեց մարզպետը՝ անդրադառնալով իր անվան հետ կապվող Գորիսի ծեծկռտուքին ու անջատեց հեռախոսը:
Մարզպետը հասցրեց նաեւ ասել, որ այդ ծեծկռտուքի հետ կապ չունեն նաեւ իր մտերիմները:
Հիշեցնենք, որ հերթական ծեծկռտուքի մասնակիցը, ըստ «Ժողովուրդ» օրաթերթի, մարզպետի վարորդի տղան է: Ըստ լրատվամիջոցի, մարզպետի վարորդի տղան՝ Դերենիկը, ծեծել է Գորիսի շինանյութի խանութի աշխատակցին՝ Վաչե Հարությունյանին: Աշխատակցին ծեծելու պատճառը, մարզպետի որդու՝ Տիգրան Խաչատրյանի ու այդ նշված խանութի տնօրենի միջեւ եղած վատ հարաբերություններն են: Մարզպետի որդին, կրկին ըստ «Ժողովուրդի», հաշիվները «մաքրում է» աշխատակիցների հետ, սակայն գերադասում է անձամբ չերեւալ:
Կարդացեք նաև
Մարզպետի թիկնապահ Զարզանդ Նիկողոսյանն էլ ընդհանրապես ծեծկռտուքի մասին չէր լսել, ասաց. «Լուրեր են էլի, ես ընդհանրապես չեմ հետեւում էդ լուրերին, որովհետեւ այստեղի, այնտեղի խոսակցություններ են: Ոչ մի ծեծկռտուք էլ չկա: Ես երկար չեմ կարող խոսել, դպրոցում եմ»:
Արփինե ՍԻՄՈՆՅԱՆ
Լիսկայի տեղը միա՛յն բանտն է: Այս մարդու ու իր կլանի պատճառով ոչ ոք լուրջ ներդրում այլևս չի ցանկանում անել Սյունիքում,որովհետև Սյունիքն այսօր դարձել է ֆեոդալական կալվածք: