«Արցախ ռութս ինվեսթմենթ» (ԱՐԻ) կազմակերպությունը սեպտեմբերի 5-ին ներկայացրեց Արցախի զարգացման ծրագրերը՝ կապված գյուղատնտեսության և բնակարանաշինության հետ:
Կազմակերպության ներկայացուցիչներ Բենիամին Պճաքճեանը և Ստեփան Տեր-Պետրոսյանը հայտնեցին, որ սեպտեմբերի 3-ին արցախաբնակներին 25 բնակարան հանձնվեց, որոնք գտնվում են Արիավան կոչվող թաղամասում՝ Աղավնո գետի ափին, և ներառում են նաև շուրջ 1 հեկտար տնամերձ հողատարածք՝ նախատեսված հողագործական աշխատանքների համար: Նախատեսվում է ևս 25 բնակարան հանձնել ԼՂՀ բնակիչներին մինչև 2016-ի վերջ: Ծրագիրն ընդհանուր հաշվով ներառում է 150 բնակարան:
Պճաքճեանը նշեց, որ բնակարանաշինության իրենց ծրագիրն իրականացվում է ԼՂՀ կառավարության հետ համագործակցությամբ: «Սոցիալական ապահովության նախարարությունն ինքնուրույն է գտնում բնակարանի կարիք ունեցող ընտանիքներին: Մենք միայն տրամադրում ենք տների կառուցման գումարը և հետևում աշխատանքներին: Առաջին 25 բնակարանները ստացած ընտանիքներից 10-ում կա բանակի սպա, 5-ում՝ ոստիկանական սպա, 1-ը սիրիահայ ընտանիք է, իսկ մնացածը՝ ապրիլյան հակամարտությունից տուժած և տունը կորցրած ընտանիքներ են»:
Բանախոսները նաև ներկայացրին կազմակերպության հիմնական գործունեությունը և գլխավոր նպատակները: Նրանց խոսքով՝ ի տարբերություն այլ կազմակերպությունների, որոնց գործուներությունը Արցախում հիմնականում բարեգործական բնույթ է կրում, «ԱՐԻ»-ն հանդիսանում է բիզնես կազմակերպություն, որը ԼՂՀ-ի կառավարության միջնորդությամբ մատչելի վարկեր է տրամադրում արցախաբնակներին՝ գյուղատնտեսական ձեռներեցությունը զարգացնելու նպատակով: Հիմնական աշխատանքները տարվում են Նոր Շահումյան և Քաշաթաղ շրջաններում:
Կարդացեք նաև
«Մենք շատ լավ ենք հասկանում Արցախի ռազմավարական մեծ նշանակությունը, այդ պատճառով աշխատում ենք ստեղծել բոլոր պայմանները բնակիչների կենսամակարդակի բարձրացման համար, ինչն էլ կնպաստի այս շրջաններում նրանց հաստատմանը», ասաց Ստեփան Տեր-Պետրոսյանը:
«Նոր Շահումյանում և Քաշաթաղում բնակլիմայական պայմանները իդեալական են անասնապահության և գյուղատնտեսության զարգացման համար: Դրա մասին են խոսում նաև գրանցած հաջողությունները: Անասնապահությունում, օրինակ, 2010-ից մինչև 2016 թվականը մանր եղջերավոր անասունների քանակը եռապատկվել է»: Տեր-Պետրոսյանը հավելեց, որ «ԱՐԻ»-ն նպատակ ունի Արցախը դարձնել Հայաստանի մսամթերքի, կաթնամթերքի և հացահատկի հիմնական մատակարարը: «Արցախի գյուղատնտեսական արտադրանքը կարող է նաև դուրս գալ միջազգային շուկա»,- նշեց բանախոսը:
«Արցախ ռութս ինվեսթմենթ» ներդրումային կազմակերպությունը ստեղծման օրից ուներ միայն 16 ներդնող: Այսօր նրանց թիվը հասնում է 180-ի: Նրանք, ըստ Ստեփան Տեր-Պետրոսյանի, հիմնականում սփյուռքահայ անհատ ձեռներեցներ և հայկական միություններ են: Ներդրումները կատարվում են 3 տարվա շրջափուլերով: Գործունեության մեկնարկից՝ 2010-ից մինչ օրս կազմակերպությունում կատարվել է մոտ 3,5 մլն դոլարի ներդրում:
Շուշան ԳԱԼՍՏՅԱՆ
