Երեկ տեղի ունեցած Վլադիմիր Պուտին-Ռեջեփ Էրդողան հանդիպմանը քննարկվել է ազատ առևտրի գոտի ստեղծելու հարցը: Այս մասին, ինչպես հաղորդում է ՌԲԿ-ն, հայտնել է Ռուսաստանի Տնտեսական զարգացման նախարար Ալեքսեյ Ուլյուկաևը: Նրա խոսքով՝ Ռուսաստանը և Թուրքիան մոտ են այդ պայմանագրի ստորագրմանը:
«Հանդիպումը նվիրված էր հիմնականում հենց տնտեսական օրակարգի հարցերին, այն հարաբերությունների վերականգնմանը, որոնք կային երկու երկրների միջև»,- ասել է Ուլյուկաևը:
Նախարարը նշել է, որ այժմ ավարտվում են ռուս-թուրքական ներդրումային ֆոնդ ստեղծելու աշխատանքները: «Օգոստոսի վերջին Թուրքիայում ընդունվել են անհրաժեշտ օրենսդրական փոփոխությունները»,- ասել է նա:
Ուլյուկաևը նաև հայտարարել է, որ հանդիպմանը Ռուսաստանի և Թուրքիայի նախագահները քննարկել են մթերային էմբարգոն հանելու հարցը, որը Ռուսաստանը սահմանել էր Թուրքիայի նկատմամբ: Նրա խոսքով՝ ռուս փորձագետները օգոստոսին եղել են Թուրքիայում՝ համոզվելու համար, որ «թուրքական ձեռնարկությունները համապատասխանում են մեր որակի ստանդարտներին», և հավելել, որ Մոսկվան Անկարայի կողմից ռուսական արտադրանքի վերաբերյալ պատասխան քայլի է սպասում:
Կարդացեք նաև
Նախարարը նշել է, որ «գործնական աշխատանք» է տարվում նաև «Թուրքական հոսք»-ի ուղղությամբ:
««Թուրքական հոսք»-ի ուղղությամբ նույնպես աշխատանքներն առաջ են շարժվում: Այդ ուղղությամբ նույնպես կոնկրետ հարցեր են լուծվում»,- ասել է նա:
Ռուսաստանի և Թուրքիայի նախագահների հանդիպումը տեղի է ունեցել երեկ՝ G20 գագաթաժողովի շրջանակում:
Պատրաստեց՝ Վիկտորյա ԱՆԴՐԵԱՍՅԱՆԸ
