Վերաքննիչ քրեական դատարանում այսօր` սեպտեմբերի օգոստոսի 2-ին, շարունակվեց Երեւանի ավագանու «Բարեւ, Երեւան» խմբակցության եւ «Ժառանգություն կուսակցության» անդամ Դավիթ Սանասարյանի բողոքի քննությունը:
Հիշեցնենք` նախորդ նիստի օրը նրա պաշտպան Ռոբերտ Ռեւազյանը Aravot.am-ին հայտնել էր, որ Սանասարյանն ապօրինի հավաք կազմակերպելու եւ անցկացնելու հոդվածով է կասկածվում, պաշտպանն էլ բողոքարկել է նրա ձերբակալման օրինականությունը:
Այսօրվա դռնփակ նիստի ավարտից հետո Դավիթ Սանասարյանն Aravot.am-ի հետ զրույցում տեղեկացրեց` բողոքարկման պատճառն այն է, որ իր ձերբակալությունն արդարացված չէ. «Կոնկրետ հուլիսի 27-ի ձերբակալությունն աբսուրդ էր: Ներկայացնում են, թե իբրեւ ես զանգվածային անկարգություններ եմ հրահրել եւ չեմ կատարել ոստիկանների հորդորը, բայց երբ եկել եմ Խորենացի փողոց, 5 րոպե էլ չեմ մնացել, ինձ տեղափոխել են ոստիկանության զորքերի զորամաս, ապա բերման ենթարկել` որպես կասկածյալ Հատուկ քննչական կոմիտեում ցուցմունք տալու համար: Ես ֆիզիկապես հեռու եմ եղել որեւէ միջոցառումից, բայց ասում են, թե իբր չեմ իրականացրել ոստիկանության հորդորը: Ուստի, սա աբսուրդ գործ է»:
Կարդացեք նաև
Հավելենք, որ Վերաքննիչ քրեական դատարանը Դավիթ Սանասարյանի վերոնշյալ բողոքի առնչությամբ որոշումը կհրապարակի սեպտեմբերի 5-ին, ժամը 10:30-ին:
Լուիզա ՍՈՒՔԻԱՍՅԱՆ
